eLaborate
::: eLaborate options :::
    Show pagebreaks
    Show variations
    Search



    Searchform

    Fulltext search

    correspondent

    Search domain

    Search site
    Search current document

    Letter



    992. 1625 Juli 18. Aan Willem de Groot1.

    Gratae fuerunt, mi Frater, ut solent semper tum tuae, tum patris literae. Mallem in curandis literis usus esses consilio Melissaei2. Nam et prudentia et auctoritate valet, nec quicquam facile sine ipso confieri poterit: quare et valetudinem ipsi et gratiam apud Principem opto ex animo. Ego multum vereor ne Principi hoc tempore minus grata sit toties repetita scriptio,

    Et nomen subeam quod dicitur officiperda3.

    De Pisoniano negotio4 transacto gaudeo, gratiasque tibi habeo. Miropianum5 commendo. Chartae de quibus scribis penes me non sunt. Hautainius6 cum sua classe ivit Rupellam pugnaturus in Subizium, ni pax ante coeat, ad quam impetrandam viginti ferme legati fratrum Rohaniorum et civitatum ad Aulam sunt. Interim ad Montem Albanum et Nemausum Espernonius7 et Theminius8 omnia vasta faciunt, etiam stirpitus excisis vitibus atque arboribus, exaratisque pascuis. Pontificius Legatus9 adhuc in spe est conficiendae pacis Italicae. Gondomarius10 Hispani Legatus totum hoc negotium silentio praeteriit, quasi salutandi Regis causa tantum venisset. Collocutus tamen est cum Legato Pontificio, et Reginae matri dixit ipsius esse ut iure matris Regibus tot et

    459

    Saubaudiae Duci, tanquam suae familiae filiis, imperet quod opus factu iudicet: Regem suum ita amantem esse Regis Francorum affinis sui, ut ipsius causa quidvis facturus sit, sive pacem, sive bellum velit. In Italia urbs Aqui recepta est a Gonsalvo Cordua11, qui nunc armis praeest non tanquam Hispanicis, sed tanquam Imperatoriis. Id enim nomen praefertur. Exemplaria de Iure belli ac pacis pro te ac patre pertulit Geldorpius12, qui Amstelodamum detulit; unde iam ad vos, spero, pervenerint. In Zelandiam iampridem misi aliqua, quae librarii postulabant. Quod si vestrates postulassent habuissent et ipsi, attamen constitui satis multa brevi in Hollandiam transmittere, simul nactus ero qui perferat. Notas meas ad Senecam Farnabius13 legit et ubi visum sublegit. Nunc ego videbor me ipsius plumis ornare. Rogo intelligas an verum sit quod dicit Scriverius, propediem a se novam parari editionem, an more suo promittat tantum: quod si sit, rectius faciam si hic notas meas edam cum versione Phoenissarum14.

    Vale mi Frater. Parentes et proximos saluta quaeso. Losecatium commendaveram nuper fratri Magni15 eius qui obiit, quique liberorum fratris tutor aut curator est, ut quae munera Bergambacti obeunda ab ipsis pendent, illi committantur. Quod sibi curae fore spopondit. Sed quia diutius hic moratur quam putaveram, puto de illis muneribus actum iam aliquid. Valete. Lutetiae 18 Iulii 1625.

    Firantio16 gratulor dignitatem. Quo loco sint res Wilhelmi17 nostri et speratae18 ipsius scire avemus.

    Tui amantissimus Frater
    H. Grotius.
    Notes



    1 - Gedrukt Epistolae p. 783.
    2 - Joris de Bye.
    3 - Cato, Dist. IV, 42.
    4 - Zie p. 453 n. 9; p. 455 n. 7.
    5 - Misschien betreft dit Jacob van Mierop, auditeur van de rekening, die I p. 301 n. 5 genoemd wordt, en ook Brieven van Maria van Reigersberch, ed. Rogge p. 308 n. 3.
    6 - De admiraal Willem de Zoete, heer van Hautain.
    7 - Zie p. 456 n. 9.
    8 - De maarschalk de Themines.
    9 - Zie p. 432 n. 5.
    10 - Zie p. 455 n. 15.
    11 - Don Gonzalez de Cordoue.
    12 - In een brief van 2 Juli schrijft Nicolaas aan Maria (Brieven van Maria van Reigersberch, ed. Rogge p. 293): ‘Geldorpii brief heb ick ontfangen. De boucken sijn tot Amsterdam.’ Volgens Rogge, l.l., is hier bedoeld Gosuinus Geldorp, predikant te Amsterdam.
    13 - De Engelsche philoloog Thomas Farnaby, die 1613 Seneca Tragicus uitgaf, welke herhaaldelijk herdrukt werd.
    14 - De Phoenissae kwamen eerst in 1630 uit; Rogge 398. Zie p. 410 n. 2. De Notae in Senecae Tragoedias in de editie van J.C. Schröder, Delft 1729. Rogge 406,
    15 - Jacob Magnus Simonsz., heer van Groot-Ammers, Bergambacht en Melissant, burgemeester van Middelburg en gezant o.a. in Engeland en Denemarken,
    16 - Huygens werd in dezen tijd secretaris van Frederik Hendrik; is deze bedoeld?
    17 - Willem van de Velde; zie p. 421 n. 1.
    18 - Elsje van Houweningen, die met Willem van de Velde trouwde.