40

3934. 1639 januari 20. Van I. Jasky1.

Illustrissime et excellentissime domine, domine observandissime,

Felicissimum praeteriti anni exitum Gallis fuisse nativitas delphini2 et Brisaci occupatio3 docet. Faxit Deus, ut ingressus et progressus huius currentis non minus eis felix faustusque4 sit, praesertim si hoc ad pacem Europae conciliandam facere potest; quam quidem inprimis misere desolata Germania anhelat et tot millia miserorum suspiriis suis et lacrymis flagitant.

Cosaci, qui nuper quasdam rursus excitaverant turbas, totos se regis5 voluntati commiserunt et se inposterum ductum ducis Polonici - qui ipsorum exercitui ex placito regiae Maiestatis praeficietur - sequuturos solemniter promiserunt.

S.R.M.tas 10 huius mensis Varsavia cum tota aula, principe sorore6, et episcopo Vratislaviense fratre7 Lithvaniam versus abiit in finibus Poloniae et Prussiae electorem Brandenburgicum8 visurus. Nos Sisyphum nostrum adhuc volvimus nec quicquam promovemus.

Tractatus de exactione marina per aliquod tempus intermissi iam brevi ex benignissima regiae Maiestatis voluntate reassumentur. Largiatur Supremus rerum Arbiter, ut negotium hoc felicem sortiatur exitum malaque impendentia a nobis avertat.

Bona spe sumus regem Galliarum9 principem nostrum Casimirum10 brevi vinculis soluturum, quam etiam auxit nobilis ille a rege nostro in Galliam eius cancellarius11 missus. Hoc si fit, amicitia, quae inter regna Poloniae et Galliae intercedit, magis magisque coalescet arctiorque reddetur.

Nihil amplius addo, ne peccem in publica commoda, quibus continenter promovendis Excell. vestrae omnes curas cogitationesque suas impendit.

Deus optimus maximus Excell. vestram florentem atque incolumem diu servet et vitae spacium cum iis bonis exaequet, quae in Excell. vestram magno republicae christianae commodo summa contulit.

Excellentiae vestrae obsequentissimus
Jasky mpp.

Dantisci, XIII Cal. Febr. A.o M.DC.XXXIX.

Boven aan de brief schreef Grotius: Rec. 17 febr.