3977. 1639 februari 17. Van I. Jasky1.

Illustrissime et excellentissime domine, domine observandissime,

Vidit rex noster2 nuper Grodnae electorem Brandenburgicum3 et familia-

104

rissime ipsi aliquoties locutus est. Summa enim horum fuit ab ineunte aetate animorum coniunctio, quae progressu aetatis etiam incrementum sumsit. Nihil ibi - ut dicitur - in praeiudicium negotii nostri vectigalarii statuerunt, quamvis multa huc rumor, quaedam et suspicio pertulit.

Sua regia maiestas Vilnae iam est, feudum ducatus Curlandiae princip(i) Iacobo Wilhelmi4 exuli filio collatura, quod insignes ipsius virtutes dignae tanto principe successionis natura et innata regiae maiestatis clementia quasi postulare videntur.

Prudentissime Brisaci custodia duci Wimariensi5, principi provido et rei bellicae peritissimo, commissa exclusis Gallis, qui infelices et propemodum negligentes sunt in Germania urbium custodes. Dignus est hic victor non tantum lauro, sed et auro regis christianissimi6.

Bannerius7 Albim cum exercitu suo 21 Ianuarii transmisit, quo fine adhuc nescitur.

Valeat, vivat, vigeat Excellentia vestra et porro amare dignetur sui

obsequentissimum
Jasky mpp.

Dab. Dantisci, 17 Febr. A.o 1639.

Boven aan de brief schreef Grotius: Rec. 29 martii.