4178. 1639 juni 20. Van I. Vossius1.

Viro illustrissimo et Τρισμεγίστῳ Hugoni Grotio S.P.

Mitto, vir illustrissime, quae ante aliquot annos in Scylacem Caryandensem2 ludens et paene aliud agens observaram. Iure ea supprimi debuissent, ne aut me aliquando scriptionis aut alios mei puderet, nisi adolescentiae foetus, quo immaturior, eo paratior visa fuisset venia. Non possem non ingenuo pudore suffundi, si haec coram offerrem, quasi ipse ignorantiae meae proditor, rosae loco foetida donarem paeonia.

Sed me ab hoc crimine excusabit aetas mea et humanitas tua, quae ab adolescente nihil, quod adolescentiam non resipiat, exposcet. Alias meliora et maiora dabimus.

Miseram iam ante menses quinque aut circiter exemplar Scylacis mei nobilissimo filio tuo Petro Grotio, ut oblata occasione tibi mitteret. Dederat is senatoris filio3 in Gallias ituro. Sed submersa illa navis. Ipse tamen salvus evasit.

In Ptolemaei Geographia4 iam versor, quem multis locis auctiorem edam tabulis etiam versione nova et commentario illustrabo. Editionem duo codices MSS morantur, quos ex Anglia propediem exspecto. Nobis enim tam beatis non contigit esse, ut licuerit Arabicam sperare versionem.

Vale, vir illustrissime.

Tuus ex animo
Isaacus Vossius.

Amstelodami, MDCXXXIX XII Kal. Quint.

Adres: Illustrissimo viro Hugoni Grotio, regni Suecici ad Christianissimum regem Legato etc. Lutetiam.

In dorso schreef Grotius: 8 Maii (sic) 1639 Isaacus Vossius.