4196. 1639 juli 9-16. Aan Willem de Groot1.

Frater carissime,

Gaudeo bene ad vos advenisse uxorem et filiam2 salvas apud salvos. Quod filius meus3, qui ibi est, ad nuptias clarorum virorum invitatur, non displicet. Accepi D. Graswinckelii δευτέρας φροντίδας4. Velim norit nulla in re eum magis ostensurum, quanti me meaque in ipsum officia faciat, quam si in hoc negotio, quantum potest, aequum se gerat. Est D. Spiringius5 homo saepe impetuosus, interdum et pertinax. Quod de sigillo confessionis scribitur, id ego non ad alium fontem quam ad id arcanum, quod inter amicos esse debet, semper retuli. Sed si officiorum regulas ignorat Spiringius, minus id mirum est. Hominem eruditum et jurisperitum ista nosse oportet.

Hesdini res bene ex voto Gallorum peracta est. Restat, ut et Batavi aliquid faciant magni, quo res communes adjuventur.

Banerii6 conatus veremur, ne multum hebescant tanto dato hostibus tempore ad coalescendum neque ulla spe adhuc apparente, ut trans Rhenum se ostendat dux Vinariensis7.

Minimus filiorum8 bene valet facitque et quae mihi grata sunt. Scripsit ad me et matrem. Utinam de maximo9 idem liceat dicere, qui consilia sua aut aliorum non bona sequens quo evasurus sit, nescio. Est ea res mihi maximo dolori. Sorori10 opto valetudinem molliorem.

Deus ipsam nostrosque omnes respiciat propitius.

Valete omnes.

Tui amantissimus
H. Grotius.

9 Iulii 1639.

445

Has literas ante dies septem jam scripseram, sed errore quodam mittere omiseram. Mitto tamen vel nunc, ut testes sint diligentiae meae.

Plane sentio non esse differendam editionem Notarum nostrarum ad Evangelia11, postquam exierint Heinsianae12. Ut mea hic a theologis Sorbonae approbentur, sperandum non est, postquam in Mileterium13 censura tam acerba exercita est. Videtur restare, ut sine approbatione excudantur domi meae, quod exemplo non caret. Sed ego distrahendis libris curam meam impendere non possum. Opus esset librario aliquo hic, qui operas typographicas mihi commodaret, quod obtinere me posse arbitror. Sed vellent qui hic sunt societatem inire cum aliquo Batavo, cujus sub nomine exiret liber. Nescio, an duo Mairii14 id suscipere et agere cum aliquo Parisiensium librariorum velint. Ego tanto hujus editionis desiderio teneor, ut historica velim praemium dare hanc mihi danti effectam. Humanis casibus obnoxii omnes sumus. Et video, quae sit haeredum saepe in talibus negligentia. Nolim meis laboribus accidere quod Picherelli15 operibus evenit, quae prope omnia intercidere magno posteritatis damno.