403

5863. 1642 augustus 30. Aan J. de Wicquefort.1

Monsieur,

Le duc de Bouillon,2 après que le chancelier a parlé à luy, est gardé fort estroictement; le frere du roy, à qui le chancelier a parlé aussy, et tiré de luy tout ce qu'il a voulu, revient à Blois avecq peu de gloire. Le cardinal de Ricelieu sera à presant à Lions accompagné de cardinaux Mazarini et Bichy. Monsieur de Thou est trainé arriere eux pour estre logé, comme on croit, à la Bastille. La mere de Cinq-Mars avoit escrit à son Eminance, mais a receu peu de consolation, c'est à dire qu'il fera ce qu'il pourra, mais qu'elle se doibt resoudre à tout evenement.

Don Melos a passé Saint-Omer pour passer en France, le comte de Guiche Maubeuge pour entrer en Flandre, cependant que le comte d'Harcourt reprend les forteresses et redoubtes au Boulonnois et pays reconquis. Mais ces armées françoises sont mal payées, comme aussi celle du comte de Guebrian et celle en Italie, où le prince Thomas a pris Crescentin le 12me et le 14me ont esté celebrées à Turin les fiançailles entre le prince Maurice, duc d'Oneglia - cy-devant cardinal de Savoye - et sa niesse.

Le duc Charles semble quitter l'Elsace pour voir ce qu'il pourra faire pour La Motte, incommodée par monsieur du Hallier. Mercy se retranche à Heffinge. 2000 de pied, 300 chevaux des imperiaux se tiennent environ Schafhuisen.

Le pape a remply Rome de guardes, continue à faire la guerre au duc de Parme et quereller Luca et opprimer Mirandula, à quoy s'opposent les Venetiens, le duc de Toscane et Modena.

De Perpignan tout est encore incertain. On dict qu'ils parlamentent, mais cela se faict souvantefois pour gaigner du temps. Je croy que les flotz de Naepels et Sicile se sont joinctes à present à celle des Espagnols, qui estoit sur la coste de Rousillon et de Catalagne, et que les François attendront longtemps celle de Portugal. Il y a eu en Catalagne des nouveaux desseings contre les François, mais mal reussiz.

Le duc de Longueville est arrivé en Italie et l'evesque de Lamego veut partir de Rome, n'ayant esté receu par les cardinaux que comme evesque. Le roy est à Monceaux, le roy d'Espagne à Saragosse avecq des forces. Les biens de la reine-mere ont esté inventarizés et estimez à deux millions. Monsieur le prince est allé voir le grand cardinal. La declaration de Porthmut pour le roy d'Angleterre faict que tous ceux qui ont pris son party reprennent esperance. Nous attendons des nouvelles du marescal Torstenson et de ce que fera le prince d'Orange.

Quant à l'ambassade de Brandenbourg, j'ay des raisons qui me font estre de vostre opinion.3 J'ay veu les escritz faicts imprimer par monsieur d'Avvaux.4 Il y a de la prudance de jetter la haine du reculement de la paix sur les ennemis, mais il me semble que si on ne veut pas recognaistre Ferdinant pour empereur que tous les sauf-conduicts et autres preliminaires sont de nulle valeur. Je croy que les princes et villes allemandes desirent la paix, mais non pas la France, c'est à dire, ceux qui la gouvernent.

404

Je suis obligé à la souvenance qu'ont de moy les gens des lettres en Hollande et principalement monsieur Barlaeus,5 et je demeure, monsieur,

vostre tres humble serviteur.

Le 30 d'Aoust.

Bovenaan de copie staat: Viquefort.