277

6223. 1643 mei 19. Aan C. Marin.1

Monsieur,

J'ay receu la vostre du 20 Avril. Le roy a finy sa vie2 fort chrestiennement le 14 May. Le 15 la reine et le roy, accompagnez du duc d'Orleans, environnez d'un grand nombre des guardes, vindrent à Paris et receurent les clefs par les mains des magistrats. Le 163 les deputez du parlement vindrent tesmoigner leur fidelité envers le roy et la reine, où estant aussi, le duc d'Orleans fist de grandes plainctes sur la declaration qui avoit esté faicte sur la regence, disant que la reine et luy y estoyent noircis, et donna au chancelier un autre acte qu'il disoit contenir la volonté du roy. Le 17 la reine, le roy, le duc d'Orleans, le prince de Condé, le duc de Vendosme, les ducs et pairs et mareschaux de France, le chancelier, le premier president, les presidents et autres conseillers de diverses chambres furent ensemble au parlement, où par un consentement general la reine fust declarée regente pure et simple, le duc d'Orleans lieutenant-general des armées soubs icelle et chef du conseil, en son absence monsieur le prince chef du conseil, sans faire aucune mention ny du chancellier et du surintendant Boutiller, ny du cardinal Mazarini et du comte Chavigny,4 qui ne s'y trouverent poinct. Voila le premier changement. Dieu nous garde de plus grand. La reine a fait asseurer les ambassadeurs qu'elle veut tenir les traittez. Je ne doute point du payement qui eschoira au mois de Juillet.5

Je demeure, monsieur,

le vostre.

Le 19 May 1643.