461

7317. 1645 februari 18. Aan Christina van Zweden.1

Serenissima ac potentissima regina, domina clementissima,

Cum videam Gallos a Batavis magnam vim navium poscere,2 colligo hinc ingens in oram Flandriae maritimam bellum parari. Quare non videntur Galli hoc anno tale aliquid acturi in Germania, quo a marescallo Torstensonio coeuntes in eum cummaxime hostium copias in se trahant.3 Pacem valde hic vult populus, non item qui possunt plurimum. Idem in Batavis fieri intelligo. In Anglia ita exardescunt animi, ut vix credibile sit pacem, de qua agi coepit,4 constitui posse. Ego tamen eam omnibus populis optare non desinam et Deum precari, serenissima ac potentissima regina, domina clementissima, ut eius confectae honor praecipuus ad augustam Maiestatem tuam redeat, nullo maiore munere christianum orbem demerituram,

augustae Maiestatis tuae obedientissimus subditus,
H. Grotius.

Lutetiae, VIII/XVIII Februarii 1645.

Bovenaan de brief in de eerste copie te Leipzig: Argumentum. Gallorum in Flandriam maritimam expeditio. Varia.