729. 1622 Maart 11. Aan Willem de Groot1.

Mi Frater,

Quas vigesimo Februarii, Pater autem vigesimo septimo scripserat, utrasque accepi et gratias habeo pro iis, quae nuntiatis, ac rerum mearum cura. Hic adhuc res inter pacem et bellum fluctuant. Cleracum receptum et in ditionem redacta Arena Dolonia animos addunt Protestantibus; at contra Regiam dignitatem ita bello illigant, ut expediri nisi cum Protestantium clade aliqua vix posse videatur. Attamen Dediguerius pro pace strenue laborat. Rotterodamense negotium2 omnino conficiendum est quamprimum. Si diem conventus praescire non potes; ita faciendum erit ut in Belgica epistola3 hanc comitante scribo, quae simul cum commendatoria inservire poterit, si cuius amicorum indigeas opera. Rogo ne ulterior interponatur mora. Etiam alter libellus Delegatis Ordinum exhibendus mihi videtur. Subsignari libellos supplices eius generis moris non est. Quod si mandati documento opus habeas, poterit quam mitto epistola sufficere. Apologeticus4 lingua Belgica iam puto ad vos pervenerit, rogo eum Pater et tu legatis quamprimum otium erit, imo sepositis etiam negotiis. In Latina versione occupor. De Gallica videbimus. Disquisitionis5 exemplaria ad amicos proxima occasione mittam. Gaudeo esse quibus non displiceat, Alopecio6 praesertim, cuius iudicium maximi facio. Da operam ut exemplum aliquod habeamus libri Cameroniani7. De Hexabiblo8 nolite quaeso diutius ampliare. Prodeat permissu publico si is paratus iam est; sin minus, sine illo. Pittacium, ut scripsi nuper, de annuo congiario accepi. Sed id genus largitiones saepe hic in vanum cadunt, ni adspiret potentium amicorum gratia, a quibus pendendum est semper, quod mihi grave est. Cum spes anni prioris me eluserit, video idem saepius accidere posse. Regem his diebus salutavi frequenti Principum et Senatorum conventu, productus a Cancellario9 et Custode sigilli10 cum honorifico testimonio. Rex ipse benignissime me excepit.

180

In Apologetico delenda censeo quae capite VI. de Spalatensi11 retuleram, ob ea quae nunc de eo nuntiantur. Tum vero capite IX. in privilegio Rotterodamensi de electione Consulum et Scabinorum, ubi de electoribus sermo, bis positum video ‘[‘vijf’]12 pro ‘seven’ ut habet antiquum privilegium. Ibidem Schoonhoviano privilegio scriptum est ‘De eerste vijf personen’ cum scribi debuerit ‘De voorsz. vier en veertig personen’. Haec ignota manu corrigantur. Librorum catalogum13 exspectabo. Lis praeiudicialis de bonis publicatis etiam nostro nomine urgenda mihi videtur. Saluta parentes et necessitudines nostras, nominatim Melissaeum14 et vale. Lutetiae 11 Martii 1622.

Cura ne clam ulla exempla Apologetici describantur, ut de aliis libris factum antehac est: mea enim refert ut tota res meae maneat potestatis.

Tui amantissimus Frater
H. Grotius.