1030. 1625 Nov. 13. Aan Willem de Groot1.

Praecisum nobis videtur, mi Frater, filum commercii literarii per Brabantiam. Restat via maris sive per Caletum, sive Rhotomagum. Rhotomagi Trezelius curam suscepit. Caleti puto tradi posse cursoribus huc ventantibus, sine parario. Rex legationem a nostris2 exspectat, et iussit eam in finibus magnifice excipi. Quid facturi sint, videbimus. Multi, si Arsenius venerit, me ad eius colloquium invitant. Dicuntur decem millia militum ire adversus Rupellam. Praeter hos Rex in Gallia, Rhaetis, Italia in armis habet ferme CX millia. Verrua defenditur, sed alia pars agri Pedemontani valde vexatur a Genuatibus. Regina mater perstat in maxima potestate, et in hoc dicitur esse ut Luiniae domus3 reliquias evertat, iniuriarum olim acceptarum memor, ut mulier, Itala, Ethrusca, Medicaea. Interim et chartaceum hic bellum fervet, nam Admonitioni ad Regem4 scriptae, quam multi a Iesuitis putant procedere, in qua foedera et amicitiae cum haereticis gravissime exagitantur, respondit Gallice mandato Regio Ferrerius5, Nemausensis quondam Minister. Respondebit Latine Cancellarii6 rogatu Rigaltius7.

Molestum nobis est tamdiu famulo8 carere. Iamdudum prospexissemus nobis nisi illum a vobis indies venturum putassemus. Etiam uxor de butyro, ut antehac, aurem vellit. Vale cum parentibus et amicis. Lutetiae 13 Novembris 1625.

Rogo librum hunc tradendum Kenenburgio tradas.

Tui amantissimus Frater
H. Grotius.