167

1170. 1627 september 8. Aan G.M. Lingelsheim1.

Mira σύμπτωσις evenit, optime Lingelshemi, ut ipso articulo temporis, quo ego alteras ad te scribebam de Syllabi editione2 interpellaturus, responsio tua ad illas priores meas mihi redderetur, per quam abunde desiderio et meo et amici mei satisfactum est. Itaque ipsum libellum nunc mittimus, hac lege, ut et titulum, quem opportunissimum iudicaveris, prae eo, quem hic scriptum vides, imponas et addas, si qua eiusdem argumenti congestoris diligentiam effugerunt. Exemplaria quot volet ad nos typographus mittere, commodum erit. Et hic quidem liber pro pace ecclesiae vota facit, pia illa et Deo non ingrata, at apud homines odii plena et eorum vitio successu forte suo caritura. Interim civilem saltem inter Christianos pacem sperare et, si qua datur, promovere liceat. Satis, satis ubique sanguinis fusum, satis multae domus in gravissimas coniectae aerumnas, quo tandem verae pietatis fructu?

Ego si te tuis laribus, tuis fortunis redditum intellexerim, erit, cur incommoda mea patientius feram.

Vale, vir amplissime. VIII. Sept. 1627.

Tuus totus ut semper
H. Grotius.

Adres: D. Lingelshemio Argentoratum.