2206. 1635 juli 31. Aan F. Sprecher1.

Vir Nobilissime,

Aliquot sunt dies, cum Veneti legati2 comitate literas tuas nono ad me Julii datas accepi edoctusque sum de rebus feliciter per ducem Rohanium3 gestis, quas iam rumor ipsiusque literae Rohanii huc detulerant. Speramus cetera pro istis initiis fore Rhaetosque veteri jure perpetuo usuros. Quid porro in Italia sit futurum, exspectat totus orbis partim iam concussus bellis partim alienorum bellorum exitus ad se spectare intelligens.

Ducis Bernhardi4 militi ne diffluat, rex5 trecenta mittit florenorum millia plura in posterum pollicitus additque auxilia de eo exercitu, quem suo sub imperio habiturus est cardinalis Valetta6 pervenire creditus ad viginti peditum, equitum duodecim millia. Sex alia equitum, peditum ferme itidem sex Incolismensis7 et Lafortius8 circa Lotharingiam habebunt communi aut partito per dies imperio.

119

Princeps Arausionensis9 Rurimondam obsidere dicitur bona cum spe capiendi non ejus tantum oppidi, sed et eorum, quae iuxta sunt, maxime si Galli ad praelia, ut scis, nati hos novos e Germania exercitus aut eorum partem conciderint.

Angli quanquam classe validi iura pacis utrisque bellantium servant. Rex ad Cantiliacum est, diei hinc itinere, cardinalis10 propius Ruellae: bene animati ambo. Quae significari magno cancellario11 cupis, et ipse perscribere prima occasione non omittam. Gaudii maximum habiturus materiam, si quid unquam facere potero, quod tibi sit gratum: cui non minus quam communi Rhaetorum omnia opto prosperrima.

Tuae Nobilitati addictissimus
H. Grotius.

Lutetiae, XXXI Julij nov. Cal. MDCXXXV.