2979. 1637 maart 3. Aan F. Sprecher1.

Pergratae mihi fuere literae, ut sunt omnes tuae, quas ad me 7 Februarii2 dedisti; neque omisi quaecumque iis continebantur cum amica tui mentione ad magnum cancellarium3 perscribere, qui nunc, quo proprior sit Germanicis rebus, Calmariam advenit.

Post Witstochiense praelium4 simul cum Torgavia capta VIII cohortes, quas regimenta vocant, Saxonum Suedicas res secutae sunt caesique hostium non pauci tum a Pfortio5, tum ab Hodilsio6 nostris. Pax Suedis offertur per marchionem Brandeburgicum Sigismundum7, subdelegatum ab electoribus Maguntiacensi8 et Brandeburgico9, qui potestatem ejus negotii ab imperatore10 acceperunt, sed nulla pax nostris placet, nisi communis et ex omnium usu.

Hic in id laboratur; ut comes Suessionensis11 ad exemplum regii fratris12 se in regis13 restituat gratiam.

Est hic et dux Vinariensis14 id urgens maxima cum diligentia, ut quamprimum agat aliquid, quod rebus Germaniae conducat.

Vallis Telina impeti ab hoste dicitur, cui jam supersunt copiae Parmensi ac Placentino territoriis bello exemptis. Quid contineant Clavennenses, quorum meministi, articuli15, breviter edoceri abs te cupiam et si quid porro dignum cognitu in Rhaetia contingat.

Vale, vir praestantissime et amicissime.

Tuae Nobilitati observantissimus
H. Grotius.

Lutetiae, 3 Martii novi Cal. 1637.