22. 1601 Juli 31. Aan J.A. de Thou1.

Iac. Augusto Thuano H. Grotius S.

Quanquam nihil haberem eximii, quod ad te scriberem, vir Illustrissime, tamen cum literas aliquot in Galliam darem committere nolui, ut non saltem mei tibi memoriam revocarem. De virorum doctrina illustrium, qui apud nos fuere, morte eiusque tempore quaesivi diligenter: sed parum adhuc inveni. nam plerique hic a literis tam sunt alieni, ut si quem in cognatione eruditum habuerint, tantundem de eo possint referre, ac si nunquam fuisset. Guilielmum certe Canterum natum Anno quadragesimo secundo, mense Iulio, die vigesimo tertio, denatum Anno septuagesimo quinto, mense Maio, die vigesimo octavo cum aetatis annum trigesimum tertium nondum explesset, ex fratre Theodoro intellexi. De Falcenburgio etiam, Nannio et Giselino spero me brevi resciturum. Sunt hic sculptores qui se omnium quae nostro bello gesta sunt, ὑποτυπώσεις propediem aiunt edere coacervatas2. Is liber si prodierit, a me mittetur, ut non tibi modo, quod omnino debeo, sed patriae meae hac re gratificer, cuius interest tantum habere rerum suarum scriptorem. Nunc ad vos fertur Mauritii Nassovii Genealogia cui adiunctae sunt omnium victoriarum delineationes sed pleraeque ultima Annalium tuorum tempora secutae sunt. Bredana tamen ad tuum opus pertinet, in qua satis accurate laboratum. Videbis mea carmina tabulae inserta. Qui eam edidere Regi offerent, cui gratam fore confidunt, si tibi non displicebit. Sed commendet sese

18

Adres: A monsieur Mon Seigneur Le President de Thou A Paris.