127. [1608 Apr.]. Aan D. Heinsius1.

Clarissime Domine.

Rogo te fasciculum hunc tradas ei viro quem nos invito Scioppio Scaligerum nominamus. Puto inesse literas ad te. Alterum quod te precor hoc est, ut si quae habes penes te exemplaria Tragoediae nostrae, tradas unum Scriverio, quem sane multis nominibus amo. Si non habes, iube peti a Typographo. Audio te et Baudium nuper coenatos apud Venium2, elegantissimum hominem. Sane, nisi se invitare turpe esset, adesse debueram: nisi posthac ob austeriora quaedam studia, exsulare me e vestro choro iubetis, quam unam poenam deprecor.

Tuus
H. Grotius.

Adres: E. hoochgeleerde wijse voorzyenige Daniel Heinsius Professeur ende bibliothecaris vande Universiteyt tot Leyden. Loont den brenger.