481. 1616 Oct. 26. Aan G.J. Vossius1.

Vir Clarissime.

Quo me die postremum vidisti invasit me iterum febris sane saeva et paene confecit. Delphos delatus paulatim respiro et ex medici consilio valetudinem quanta possum diligentia curo. Sanguis missus indicat contraxisse me aliquid melancholici veneni; quod nulla re magis diluitur quam fidelibus amicorum alloquiis. Nisi vererer ne absentiam tuam non ferret Collegium, optarem ardenter tuam mihi consuetudinem in dies, aut - si id nimium est - in horas aliquot concedi. Attinebor enim hic adhuc per tempus aliquod; interea vix est quod agam, et otium ipsum taedio est. Venit hodie me visum Mylius, qui recepit se curaturum de mercedula exscriptorum2; sed putabat duobus exemplaribus peregre mittendis superaddendum tertium, quod hic interim ab amicis legeretur. Spero iam aut duabus aut uni saltem descriptioni impositum finem. De Satisfactione vereor an satis tibi vacaverit. Sed utinam te videamus. Scio idem optare Diamantium, qui officio non deest. Vale amicorum optime cum uxore et familia. 26. Octob. 1616.

Tuus semper et aegrotus et valens
H. Grotius.