862. 1623 Dec. 11. Van Jan de Groot1.

ξὺν ϑεῷ τῷ παντοϰράτορι.

Salve fili cum uxore et liberis omnibusque isthic amicis ab nobis hic omnibus. Quae in literis XXX praeteriti mensis die ad nos datis περὶ τοῦ τῶν Καύχων προστάτου2 indicasti, ipsemet meis literis significavi. Mansfeldii res eodem adhuc sunt loco. Nostrates stratagema quoddam navibus tentaverunt, sed frustra. Ecquod illud fuerit, secretum manet. De Εἰρηνώπολι3 certiora inquiremus. Exhibitus est a ministris Remonstr. libellus Hollandiae Ordinibus4, sed talis ut vix speretur bonus eventus. Botius5 tertium detinetur, dicitur cum exteris aliquid machinatus. Turbae nuper exortae sunt in pago Maeslandtsluys, propter novum tributum trium sestertiorum in singula piscium salsatorum vasa, cumque iussus esset publicationi edicti ea de re Ordinum adesse Keneburgius ut toparcha, haud longe abfuit a magno infortunio. Civis quidam cum ipsum verbis defenderet, suo ipsius ense confossus occubuit. Molinaeus6 cum sua centuria tumultui maiori impediendo missus est. Sed et Bredae cum delegati Ordinum militem recensere vellent, coepto desistere coacti sunt toto praesidio pecuniam prius postulante. Certe stipendia valde tarde ubique solvuntur. De Petro vestro itemque nostro meliora exspectamus. D.O.M. vobis nobisque omnibus sit propitius ac clemens. Raptim Delphis XI. Decemb. 1623 St. novo.

Tuus ut mereris pater
Jan de Groot.