1288. 1628 juli 26. Van B. Aubéry du Maurier1.

Monsieur,

Tant moins il vous éclaire d'espérance d'un honorable retour en vostre patrie, et à nous d'une paix asseurée en la nostre, tant plus espère-je de la bonté de Dieu qu'il pourveoira bientost à l'un et à l'autre; ny ayant rien pour le particulier ny pour le public que je désire plus passionnéement et dont je le prie plus ardemment. Pour le premier j'ay veu celuy qui va ambassadeur pour le roy en Hollande2, que j'ay tousiours recogneu d'un esprit modéré et veux espérer qu'il ne se portera à chose ny déraisonnable ny violente. Sur ce qu'il a témoigné désirer sçavoir de moy je l'ay premuny de tout ce que j'ay creu pouvoir servir aux gens de bien, vos compatriotes, et ne luy ay pas épargné la cognoissance des complexions des autres, mesmes du Cretensis3 pour s'en garder et ne lier aucune confiance avec luy. Je croy l'avoir aussy guéry des mauvaises impressions qui luy avoient esté données sans doute par le dit Cretensis de la personne du prince4, que l'on luy avoit dict posséder une âme italienne dedans un corps flamand; au contraire dequoy je luy ay asseuré n'y avoir recogneu que de la candeur et bonté, que s'il n'y trouvoit ces deux qualitéz il faudroit qu'en luy les honneurs eussent extrêmement changé les meurs. Voyez si par quelque leur organe il y auroit moyen de le tenir adverty de ces choses et que ceux qui luy ont voué service luy en rendent aux ocasions.

347

Au surplus il faut que je m'ouvre librement à vous comme à un affectionné, capable, et fidelle amy de la pene où je me trouve pour mes deux plus jeunes fils5, dont l'un a 16 ans, l'autre prend les 14. Ils ont esté jusques icy asséz bien instituéz et sont avancéz selon leur aage et portée, sont fermes en la langue latine, ont de bons commencemens en la grèque, sçavent asséz bien la géographie et l'histoire universelle du monde depuis sa création, comme aussy sommairement celles des principaux estatz, avec quelque petit goust de la logique et physique. Mais il arrive que leur précepteur6 est résolu de se retirer pour penser à soy, n'ayant peu obtenir de luy qu'il continue plus avant cet exercice que jusques à la fin de cette année, laquelle j'apprehende extrêmement en leur égard. C'est pourquoy je vous supply m'assister de quelque bon conseil en cette nécessité me disant ce que vous estimeriez que je pourrois faire non seulement pour ne perdre ce qui est si bien commencé en cette jeunesse, mais pour tascher d'y donner quelque accroissement. De quelque costé que je tourne les yeux, je ne voy lieu où pour cet effect je puisse les placer utilement. Ils ont esté à Leyden et à Genève, comme aussy à Basle, par tout là il n'y a point bon exercice non plus qu'à Sedan ny à Saumur, et ainsy je me trouve esperdu et perplex de ce que je pourray faire d'eux. Encor celuy qui a 16 ans pourroit avec quelque ayde commencer d'estudier de soymesme, mais celuy de 14 qui a bon esprit et bonne volonté auroit besoin de plus particulière inspection que l'autre. Je recevray à consolation et obligation ce qu'il vous plaira me dire là-dessus, dont j'écris aussy à monsieur Tilenus7, vous suppliant d'en conférer ensemble et m'en donner vos bons aviz, lesquelz j'attendray en bonne dévotion et cependant salueray bien humblement vos bonnes grâces et de madlle. vostre femme, comme faict la maistresse de céans8 vous conjurant de plus en plus de faire très certain estat que je seray toute ma vie,

Monsieur,
Vostre bien humble et très affectionné amy
et serviteur
Dumaurier.

Je ne doy obmettre de vous dire que grâces à Dieu mes deux aisnéz reprennent à bon escient le frein aux dents, ce qu'ilz avoient semblé reculer n'ayant esté que pour mieux sauter.

De la Fontayne dangé ce 26 juillet 1628.

Adres: A Monsieur Monsieur Grotius.

In dorso schreef Grotius: 26 Iulii 1628 Maurier.