1418. 1629 augustus 18. Aan G.J. Vossius1.

Quoties tuas video literas, vir optime atque amicissime, toties, non dicam a malis meis acquiesco, quae si qua sunt ferre pridem didici, sed novos accipio spiritus et in illas quas semper amavi literas quasi reducem reponi me sentio. Gratias summas habeo pro cura quam filio2 meo impendisti et impendere non cessas. De ingenio est quod Deo habeamus gratias: diligentia excitanda erit et dedolandi mores, quas ad res ego et uxor, minime deses et haud nimium indulgens femina, jungemus operas. Vertit nunc Horatiana in aliud genus carminis, Phoenissas ediscit Graecas, officia Tullii perlegit et summam sensus mihi reddit.

Tuum Iohannem3 in Britannia vivere gaudeo, nusquam tam felix est ad studia otium, nusquam tantus honos piae antiquitati. Felicem Cantuariam4 sentio, quae te vel titulo possideat. Non poterit tibi homini tam foecundo deesse, quo gratum in Britannos animum testeris.

88

In Coddaeo5 sane non levem jacturam passae sunt literae non tam morte quam ex quo utilis esse desiit. Hic famam remque eruditionis prope unus sustentat Salmasius6, qui tui, quod gnarus affirmo, est amantissimus quantique te faciat in omni sermone ostendit. Vidistisne ingens illius opus in Solinum voce, re in Plinium7, admirabilis πολυαναγνωσίας memoriae tenacissimae, judicii limatissimi? Sunt in eo praeter res infinitas Plinianae materiae διεϰβάσεις utilissimae, ut de circo, de triclinio, de agri mensura, tum vero vocum Latinarum ex Aeolico sermone derivationes eruditissimae, quales et in Historia Augusta8 et in Pallio9 nonnullae, usui futurae, si quando promissum diu Etymologicum Latinarum vocum exhibebis10.

De typothetis quam juste queraris, vel ex nova librorum de Veritate Christianae religionis editione11 agnosco. Utinam de Phoenissis12 res melius procedat.

Reddunt tibi salutem is, quem dixi summus Salmasius, Tilenus13 et Rigaltius14. Brevior in scribendo sum, quia multas historias, quas literis complecti vix ...15 est, frater coram narrabit. Ego interim, frater, uxor, liberi, te, tuam16, tuos quanta maxima possumus salute impertimur.

Lutetiae, 18 August. 1629.

Slupeckios Barones17 quibus potui officiis colui et ob suas virtutes et quia tuae commendationi18 maximum apud me pondus est. Duo majores jam Galliam lustrant, tertius hic haeret. Delector unice ejus moribus ac studiis. Et si quid eorum causa potero, efficiam; videant, quanti mihi sint omnes, quos caros habes.

Tuarum virtutum perpetuus admirator

H. Grotius.