1675. 1631 september 18. Aan Willem de Groot1.

Exspectamus hic a vobis, frater, historiam victoriae nostrorum de comite Iohanne Nassavio2, quae mirum quanta hic praedicatur. Expedit rebus eorum, qui nunc hic imperant, res Hispaniae accisas credi, quo pauciores sint, qui se ad fratrem regium3 inde auxilia exspectantem conferant, ad quem dicuntur jam aliquot cohortes defecisse. Cardinalis4 et vitae suae consulit acri custodia et vim quotidie intendit, nunc et Caleti praefecturam ad se trahens. Haec omnia fieri non possunt nisi maximis sumtibus, nam praefectis veteribus pecunia, ut exeant, danda est.

Mitto ad te indiculum erratorum in Phaenissis5.

Duo adjeci, unum perspicuitatis gratia, alterum quo lenius verba fluant. Caetera omnia a typothetis peccata sunt et eorum quaedam talia, quae sensum aut versum corrumpant. Quare censeo leviora quaedam in exemplaribus nondum divenditis calamo corrigenda; de caeteris monitricem pagellam adjiciendam.

Vale cum parentibus, uxore6, liberis, amicis. Schickardi7 rogo et Cordesii8 ne velis esse immemor.

18 Sept. 1631.

Has epistolas ab Arausione quamprimum tradendas ut cures, rogo.

Tui amantissimus frater
H. Grotius.