Search
Add panel
[tiler debug info]
Choose a letter
Femina, pro qua nuper ad te scripseram2, has mihi literas dedit ad Francimontium3 curandas, ut ejus opera accipiat aut descriptum ex matricula baptizatorum aut documentum, quo constet talem matriculam, cum ipsa nata est, non fuisse. Ipse, qui presbyterio publico quam tu est notior, melius illud curabit; tu tamen rogo consilio juves.
Gratias maximas habeo pro historia rerum ad Scaldim nostris sane prosperarum4. Utinam vel hoc experimento doctae partes, quantum in bellis fortunae liceat, animos ad tutiora et meliora flectant.
At vero hic etiam spirare incipit Mavors: apparent enim copiae regii fratris5 et, ut rumor est - non tamen apertus, metu potentum -, jam regiarum turmarum sanguine bellum imbuerunt. Sunt qui pacem sperant ex adventu Lotharingi ducis6; mihi fit credibilius ipsum suis rebus consulturum securum, quo de caetero casura sit alea.
Aula nunc est Trecis et ibi est e Sabaudia cardinalis7, cujus et frater princeps Carignanus8 ibidem exspectatur, amicitiae cum Galliae regno magna pignora:
439
majus aliud sunt quae augurentur ex matrimonio Combalettae9, cui avunculus est Riceliacus, cum Sabaudo Cardinali. Dos dicitur duo auri milliones. Ego, si id fit, de quo dubito, rem eo spectare puto, ut quae in Subalpino tractu rex nunc tenet reddantur, etiamsi in mora reddendae Mantuae maneat imperator10. Esset quidem Galliae id non minus probrosum quam damnosum. Sed ut res privatae publicis officiant, non est novum.25 Septembris 1631.
Tui amantissimus frater
H. Grotius.
