Search
Add panel
[tiler debug info]
Choose a letter
Nobilissime Domine Legate,
Diversas tuas literas e diversis locis iam quinque accepi ultimis ad aedem Dionysii datis die XII februarij2, pergratae omnes et quod cognoverim usque eo feliciter successisse tibi iter tuum et ob diligentem quam mihi facis omnium rerum communicationem, in qua, ut assidue et, quotiescunque spes sit perferri literas posse, similiter continues, rogo.
Video, quae unis in literis scribis de negotiatione legatorum Hollandicorum3, sed, cum in diversum relationes ab aliis tendant, aveo ipsam rei hujus veritatem et fundamenta cognoscere, si possibile tibi sit eo penetrare. Caeterum in negociatione tibi demandata caute pergas insistens omnimodo praescriptis limitibus et de cunctis, antequam quidquam concluseris, ad me diligenter refer.
Delibero ipse mecum, numne per Galliam mihi iter sumendum sit; nec videntur deesse rationes. Verum si eo venturum sit, per expressum id tibi nuncium ac simul de ulteriori voluntate mea mature significabo.
Ex literis tuis perscriptis secretario meo Smaltzio4 video premi cognatos meos5 Parisiis commorantes aliqua pecuniarum inopia; id si sit, rem mihi gratissimam feceris, si usque in adventum dicti expressi nuncii, cum quo ulterius rebus ipsorum providebo, centum vel circiter coronatos usibus ipsorum e tuo subministres tibi vicissim a me plene numerandos.
In reliquis tantum monendum occurrit, quod, ubi de Benfeldio cedendo erit
358
agendum, des operam, ut tormenta bellica, quae ibidem insignita armis Suecicis non exiguo numero reperiuntur, commeatus etiam, pulvis tormentarius et caetera belli instrumenta abunde satis illata nobisque ob caritatem et inopiam plurimum necessaria excipiantur, vel earum rerum nobis satisfactio alibi sive in iisdem speciebus sive ad aestimationem fiat.Nec minus diligenter elabores, ut subsidium evincas, praesertim ut promissus jam ante et debitus terminus praestetur, ubi vero promptos in negotio subsidii inveneris, mentionem dictorum tormentorum et caeterarum rerum non nisi leviter facere opus est.
Moderare omnia pro prudentia tua, cui haec cuncta permitto expectans interim assidue tuas literas diligentes omnium actorum nuncias.
De caetero optimam valetudinem et prosperos rerum gerendarum successus tibi ex animo precor.
Dabatur Wormatiae die 2 martii Anno 1635,
Tui studiosissimus
Axelius Oxenstierna m.p.
Adres: Nobilissimo Domino Hugoni Grotio, Sacrae Regiae Majestatis et Coronae Sueciae consiliario secretiori aulico et ad Christianissimam Regiam Majestatem Legato.
In margine schreef Grotius: 12 Martij 1635 Canc.
In dorso: 12 Martij 1635 Canc.
en nogmaals: 1635 12 Martij Canc.
