2526. 1636 maart 27. Aan L. Camerarius1.

Illustrissime Domine,

Sterilia rerum novarum esse solent non hyemis tantum, sed et crudi adhuc veris tempora. Tamen digna nuntiatu victoria apud Ravonem in Lottharingia Gallis contigit. Capiebant isthac iter caesariani2, quos e Basiliensi agro vicinisque locis fames abegerat, ut agrum Lutsenburgicum peterent sociorum se ibi copiis addituri. Re intellecta - neque enim latere agmen duorum ferme millium poterat - occurrit a Novocastello, quod apud Tullos est, marchio Lafortius3, marescalli patris4 in laudes succrescens filius, patentibusque ad Ravonem campis deprehensum hostem non longo praelio praecipua tuborum vi, quos musquettas vocant, partem alteram exitio dedit, alteram fugere coëgit captis equestribus signis fere duodecim.

In Italia ad reprimendos Mutinensis per agrum Placentinum cursantis processus Crequiacus5 cum septem peditum millibus, equitibus mille ducentis aut amplius partim sui partim Sabaudici militis ad Ticino amni proxima promovit se ipsumque Mediolani praefectum6 eo metu Novariam pertraxit.

Fontani castello adsita pergit occupare Rohanius7. Difficilem in deliberationem idem dus implicuit Rhaetos, qui nunc Curiae conventum habent, regis8 mandato ab eis postulans, ut contenti juris imagine vim ipsam imperii in Vallem Telinam remittant ac ne protestantibus ibi habitare liceat.

Legatus Britannicus9 diserte a me id10 postulavit, ut gratias pro se tibi

51

Speramus, ubi in Britanniam venerit Beverius12, tum ibi, tum hic aliquid actum iri. Ego, si nihil potero aliud, favebo votis; quae et pro te tuisque facere non desinam.

Illustrissimae Dominationi Tuae
addictissimus ejusque observantissimus
H. Grotius.

27 Martii ex n.c. anni 1636.

Adres: Ludovico Camerario, Reginae Regnique Sueciae Consiliario et Legato apud Praepot. Ord. Foeder. Belgii.

Boven aan de brief in de copie te Uppsala in margine: Redd. Delfis A.o 1636 9/19 April.