Search
Add panel
[tiler debug info]
Choose a letter
571
Excellentissime Domine,
Venit huc me gaudente D. Mullerus2. Laboramus ambo ad rem communem et eam maxime, quae ducis Vinariensis3 egregia virtute nititur, promovendam.
Is et magnis et celeribus indiget auxiliis. Venit contra eum Isolanus4 cum cohortibus sive regimentis Croatarum undecim, earum, ut advenere, copiarum et earum, quas Waertius5 habebat, bonam partem in pugnam dux prolicuit simulato post capta Molbergam et Ettinhemum Kitsingae obsidio - nec eum fefellit consilii prudentia - urbis ad Brisaci aditum adeo opportunae, ut ab hoste deseri non posset. Itaque obvium is se tulit magno peditum, magno equitum numero, et duce metum ac receptum simulante pars ejus tracta in loca rivo impedita, converso duce et Gallorum duce Haillerio6 partim in aquas acta partim trucidata partim dispersa est. Quod supererat agmen tota nocte dux insecutus mane proximo reperit in valle, quae a castris hostilibus aberat non longe. Pugnavit in hos quoque per tres horas feliciter profugosque in castra pepulit.
In Italia quoque non minus prosperum sibi evenisse ad Astam praelium ajunt Galli caesaque jactant sex millia et Sabaudo7 forte nec volenti ingentes agunt gratias pro sociali opera.
In Languedocia omissa Leucata hostis introrsum penetravit captisque municipiis ignobilibus magna ibi frumenti, quod a Gallis alibi custodiri debuerat, potitus est copia.
Dux Lotharingus Carolus8 a Brisaco retro se tulit et in Lotharingia habet non mediocrem exercitum, quem Longavillano9 ad Bleteravium in Burgundico comitatu sedenti opponit.
Ad Dampvillerium Castilionaeus10 permunivit11; nunc inchoabit flexuosos cavosque aditus; speratur et id oppidum et Capella fine autumni aut citius aliquantum ventura in potestatem.
Baro Degenfeldius12 eis, quae ad Malbodium fines Gallicos tutantur, castris egressus hostium insidias excursorum, in quos incidit, indicio cognitas clausit indagine fecitque plus centum captivos partim selectos milites partim ductores ordinum.
Chevreusii uxor13 capi metuens ob eas causas, quarum rei aguntur multi ex
572
amicis uxoris regiae14, in Angliam fuga evasit. Est in eadem Anglia nunc, ut arbitror, Reius15 a Polonia legatus, ut regem16 de spretis Palatinae nuptiis excuset.Turca17, ut audimus, cum Polonis pacem firmavit una lege, ut Cosaccos reprimerent. Ipse Cantamirii filium18, quod is Polonum occidisset quemdam19, mortis affecit supplicio; addunt quidam et interfectum in itinere ad praefecturam ipsum Cantamirium invisum Polonis. Tartaria Praecopiensis a novo Turcae cliente20 sine aemulo jam possidetur evoluto fortunis rege21, qui nuper centum millia et quinquaginta ductabat. Ragotskius22 tributum solvit; recepit munera a Turca insidias forte et ultionem occultantia.
De induciis Gallos inter et utramque Domum Austriacam per pontificis23 homines agi et Viennae et Madritii certum est, sed peractu difficile est id negotium. De Hanovia rumor hic est utinam falsus convenisse eam cum imperatore24. Vale, vir excellentissime.
Excellentiae Vestrae omni cultu addictissimus
H. Grotius.
Lutetiae 9/19 Septembris 1637.
De pace Persam25 inter et Turcam vacillant eorum, qui rem norunt judicia, quanquam legatus26 a Perside Aleppum, inde Constantinopolim cum muneribus venit.
