752

Bijlage no. 38 Bij no. 5445
Brief van Christina van Zweden aan Lodewijk XIII dd. 30 oktober 1641.1

Nos Christina, Dei gratia Suecorum etc., serenissimo et potentissimo principi, fratri, consanguineo foederato et amico nostro carissimo, domino Ludovico XIIIo, eadem gratia Franciae et Navarrae regi christianissimo, salutem et prosperos rerum successus!

Serenissime et potentissime princeps, frater, consanguinee, foederate et amice carissime,

Cum arcta illa foederis mutui2 necessitudo postulet, tum ut fortibus utrinque armis, tum coniunctis de pace tractatibus consiliisque cooperemur ad eundem finem, pacem utrisque nostrum et caeteris, quorum interest, decoram, iustam atque tutam ac consequenter universalem obtinendam vel maxime invitatam, et postquam nobis innotuit Ser.tem vestram a maturando eodem negotio non esse alienam, cogitationes non modo suscepimus ineundorum tractatuum pacificatoriorum, sed et expedivimus hisce diebus in Germaniam nostrum regnique Sueciae senatorem et cancellariae consiliarium, illustrem nobis sincere fidelem dilectum, Dn. Johannem Oxenstierna, liberum baronem in Kimitho, dominum in Fyholm, Horningsholm et Tulgarn, quem iam propediem et alius ex nostris regnique senatoribus sequetur3; eisque ordinarius noster, qui Hamburgi hactenus commoratus est, legatus4 adiungetur, ut, cum inter hunc et Serenitatis vestrae ordinarium5 ab una et caesareum inibi legatum6 ab altera parte de residuis ipsorum tractatuum praeliminaribus rite convenerit, praesto nostrates sint ad destinatum ac conventum locum se recipiendi. Id cum significari fecimus Serenitatis vestrae hic residenti7 mandavimusque legato nostro Hamburgi commoranti super hac re cum ordinario vestro per Germaniam inibi autem degenti legato communicaret, non dubitamus, quin et ab iisdem Serenitas vestra adornatam a nobis legationem eo fine esse perceperit.

Rei autem magnitudini convenire existimavimus de eodem quoque propriis nostris literis ac per ordinarium nostrum apud Serenitatem vestram legatum, nobilem ac magnificum nobis sincere fidelem Dn. Hugonem Grotium, Serenitatem vestram omnino certiorare: cui ut fidem in illis, quae nostro nomine pariter etiam Serenitati vestrae propositurus, Serenitas vestra adstruat, peramice ab eadem requirimus.

Deus consiliis nostris utrinque benedicat et Serenitatem vestram potenter tueatur.

Sacrae reg. Maiestatis regnique Sueciae resp. tutores et administratores

Matthias Soop, loco r.S. archidapeferi
Iacobus de la Gardie, r.S. marsch.us
Carolus Gyldenhielm, regni ammiralius
Axelius Oxenstierna, r.S. cancellarius
Axelius Axeli, loco r.S. thesaurarii.

Dabantur in regia nostra Stocholmensi, die 20 Octob. 1641.

Op de achterzijde van de Haagse copie schreef Grotius: 30 Oct. 1641 regina regi.