5687. 1642 april 19. Aan A. Oxenstierna.1

Excellentissime et illustrissime domine,

Altero huius mensis die,2 cum iam tribus in locis ruina facta esset in vallo oppidi3 et per eam Galli oppidum invaderent, Hispani eo derelicto in arcem se recepere, cuius iam fossam oppugnatores transeunt. Ubi ea capta erit et Rosae, sperare Galli poterunt hoc ipso anno etiam Perpiniano se potituros. Motta Hodincurtius circa XXVII Martii caesis tertium Hispanis captisque eorum tribus in conflictibus bis mille quingentis militibus, maiora officia fungentibus ferme trecentis, magnam laudem et dignitatem marescalli Franciae adeptus est.

Hispani ex Belgico in Gallicum finem movere se incipiunt, Bavarus et ecclesiastici electores novum militem collegerunt ad duo millia; ei prospiciunt de commeatibus. Rex Britanniae etiamnum Eboraci est diciturque portum Hulli, qui non longe inde est, habere in sua potestate. Recepere se ad eum nobiles quidam tum ex parlamento, tum aliunde. Sed sine externis auxiliis et quidem grandibus nihil efficere poterit, quando parlamentarii mare tenent et militem ubique scribunt, qui ipsis, non regi pareat. Turcicos armorum paratus magnos esse intelligimus. Magnam occasionem habet Turca invadendi Hungariam, sed solent Austriaci datis pecuniis consilia bassarum4 alio deflectere.

Deus, [etc.].

Lutetiae, IX/XIX Aprilis 1642.

Marescallus Hornius Benfeldiae se refovet. Pro cardinalis Riceliaci valetudine preces fiunt ab iis, qui ipsum amant. Duci Bulionio pecunia data ad conscribenda septem millia militum, ut inde et ex cohortibus Helvetiis augeat eum, qui in Italia est, exercitum. Halerius vero parat obsidium Mottae, habens sex millia peditum, equites mille et quingentos. Guichius exercitum habet apud Rethelium, apud Peronam Harcurtius. Melo vero Hispanus apud Duacum XXV millia habet. Nondum abiit classis a Bresta5 et quinque illa Britonum millia quo itura sint, adhuc latet. Dignitas marescalli Franciae etiam Guebriano data est. Rex Hispaniae paene omne aurum et argentum, quod ex America venit, in suos usus retinet et nummi pretium duplicat. Iam nunc intelligo etiam arcem Colubri Gallis deditam XIII Aprilis et obsessum iri Tarragonam a Motta Odincurtio, Rosas a Milleraio. Praesidiarii arcis Hohentvilae commeatus multum et praedae in Suevia adepti sunt. Hispani naves longas multas Gadibus contrahunt

195

Bovenaan de brief in de copie te Leipzig: Argumentum. Felices Gallorum in Ruscinonensi tractu successus. Anglica. Varia nova. Guebriano et Mottae Odincurtio marescalli dignitas data. Colubri deditio. Caroli Lotharingi a pontifice ad concilium facta appellatio.