5833. 1642 [augustus 9]. Aan J. de Wicquefort.1

Monsieur,

La guerre se faict froidement en ces quartiers,2 Melos et Beck se tenans prèz de Valentienne et les contes d'Harcourt et de Guiche prèz de Crecy. Monsieur d'Hallier faict des forts environ La Motte et le duc Charles se va joindre aux imperiaux pour tenter quelque chose en Elsace.

De Perpignan on ne sçauroit rien dire encore. Leganes ayant cy-devant treize mille hommes en a receu dix mille de nouveau par la voye de Roses, et ce qui est grandement à considerer, le roy de France s'est esloigné de Perpignan et le roy d'Espagne s'en est approché, se tenant à Saragossa, qui est six lieux de Perpignan; l'armée navale des Espagnols [aussi bien] que celle des François, lesquels se remettent, ayant estez escartez par l'orage. Les mareschaux de Schomberg et de La Mileray attirent du Languedocq tant qu'ils peuvent. Le duc d'Anguin les est allé voir avecq force noblesse, et le roy leur envoye de ses regiments de guardes et chevaux legers.

Le roy et la reine sont fort bien ensemble et vont à Saint-Germain. Monsieur le frere de nouveau est à Nizzaz. Les advocats du roy estants consultez par le roy jugent que son tesmoingage a assez des forces sans confrontation. Le chancelier avecq bonne guarde est allé à Lions. La fille du duc de Bouillon3 est venue icy.

Je prie Dieu, monsieur, de vous conserver en sa guarde paternelle, demeurant,

vostre tres humble serviteur.

367

Le roy publie un manifeste contre les prisonniers. Monsieur le frere du roy persiste à ce qu'il a dict et reçoit de l'argent. Les commissaires sont les premiers presidens d'Aix, Grenoble, Thoulouse, trois conseillers de chacun de ces parlements, quelques-uns du Conseil d'Estat et maistres de requestes.

L'accord avecq les princes de Savoye est conclu pour la France et pour Madame. Le prince Thomas a veu Madame. Les Espagnols sont sortis non seulement de Nisce, mais aussi de Villafranca. L'armée françoise en ces quartiers est commandée par monsieur de Pralin et attend l'arrivée du duc de Longueville. La pluspart de l'armée françoise est à Barcelone. L'espagnolle consiste en 40 galeres, 60 autres navires et attend du renfort de Naples.

Je fais mes recommandations à monsieur Brasser,4 si vous plaist, et à monsieur Barlaeus.5

L'armée navale du Grand Seigneur est allée vers Asac.

Bovenaan de copie staat: Monsieur Vicquefort.