6069. 1643 februari 3. Aan C. Marin.1

Monsieur,

J'ai receu la vostre du 11 de Janvier, en nous souhaittant toute sorte de bonheur et en cette année et plusieurs suivantes.

Trautmansdorff a envoyé icy2 un moine jacobin de la maison d'Heberstein pour voir si on est disposé icy à quelque paix. Et combien qu'il a porté de lettres addressées au cardinal de Richelieu, si croit-on qu'elles ont esté escrites depuis que à Vienne on a eu la nouvelle de sa mort, faisant la mine d'estre surpris par cette mort. Il a presenté un memoire au cardinal Mazarini. Les ministres du roy ont respondu sagement qu'il ne soit pas au roy qu'on n'est venu à la conference, puisque ceux de Vienne ont refusé de ratifier ce que sur les preliminaires par ceux qui avoient pouvoir, estoit conclu. Et sur ce que disoit Heberstein qu'il n'y avoit personne pour le roy à Hambourg, on luy a dit qu'il y avoit monsieur de Saint-Romain, resident pour le roy, qui en cette qualité avoit esté recognu par le roy de Danemarcq, mediateur du traitté. Il y en a qui croient que outre cela il y a eu icy des gens du duc de Baviere et que cela est cause que l'armée du mareschal de Guebrian recule vers Brisac.

Le roy, la reine, les enfants de leurs Majestez se portent bien, et les ministres vivent en bonne intelligence. Si on croioit icy qu'on pourroit destacher le roy d'Angleterre des conseillers favorizants d'Espagne, on s'employeroit tres volontiers pour le mettre bien avecq son parlement. Les catholicques romains d'Angleterre se declarent partout pour leur roy, à quoy aidera, on croit, la presence de la reine, qui à present doit estre arrivée

70

Je demeure, monsieur, tousjours

le vostre.

3 Febvrier 1643.

Bovenaan de copie staat: A m. Marini.