78

3959. 1639 februari 5. Aan I. Jasky1.

Nobilissime domine,

In veteri jure augurali2 proditum est auguria aliaque omina3 ad eos non pertinere, qui ea se observare negaverint. Ideo nec vobis nocebunt illa, quae epistolam Nobilitatis vestrae4 comitabantur, missa ad me vaticinia. Vates dicuntur tum poetae tum prophetae. Quod si hic in vocibus aliquot ostendit poeticae se nescisse leges, quis ei de prophetia credat? Duo tamen laudo, quod frugalitatem et modestiam dicit civitatum esse tutelas; deinde quod in accersendis externis auxiliis cautione aliqua est opus. In responso multa sunt et cordata et lepida.

Regis vestri5 cum electore Brandenburgico6 colloquium et iter tam pertinacis propositi in Lithuaniam vigilandi necessitatem finitimis denuntiant. At annon satis una superque cum domo Austriaca affinitas7 fuerat? Credibile est formidaturam Polonam nobilitatem, ne vinculum illud duplex suam compediat libertatem.

Cosacci, si inter se concordes sint et Turcam8 habeant fautorem, monere poterunt Poloniae regem, ne turbas cum periculo quam quietem sine damno9 malit.

Dux Vinariensis10, postquam Brisaci custodiae bene prospexit, in comitatum Burgundiae duxit exercitum ibique capto oppido Pontarlerio11 late tenet agros, late territat urbes.

Helvetii trepidant circumsepti ferme undique vi Austriaca, quae jam clientes habet et12 Rhaetos. Constantia aliaeque circum urbes magnis Austriacorum praesidiis tenentur. Ad tutandam libertatem una illis patet via, quae castra spectat Vinariensia.

Magni in ver, quod imminet, paratus hic belli sunt terra marique in Hispanos et in13 Hispanienses Belgas. Sed ne pro certis habeamus, quae sperantur, annus jam exactus et Gallis et Batavis, ad Brisacum etiam caesarianis magister esse potest.

Vale, vir nobilissime, et nos ama.

Nobilitatis vestrae studiosissimus
H. Grotius.

Lutetiae, V Februarii ex novo Calendario anni MDCXXXIX.