4047. 1639 april 2. Aan I. Jasky1.

Nobilissime domine,

Bene ad me pervenerunt literae, quas dedisti XVII Februarii2.
Solent conventus et colloquia magnorum principum plus occultare quam publicetur. Sic et consilia, quae sumpta sunt a rege Poloniae3 et ab electore Brandenburgico4 qualia sint, tempus docebit, nec aliud video contra occulta ejusmodi remedium quam νῆφε, ϰαὶ μέμνησ᾽ ἀπιστεῖν5.

Curlandiae principi6 faveo et olim, cum in parte reipublicae Batavicae versarer, eam causam non tantum ejus reipublicae proceribus commendavi, sed et effeci, ut eorum literis regi Sigismundo7 aliisque principibus commendaretur.

Interfuit non Germaniae tantum, sed et Galliae, ut Brisaci custodia vigilantissimo principi8, cujus eximia virtute parta est urbs, committeretur. Nos hic in id laboramus, ut habeat a rege9, quod opus est ad transmovendum ultra Rhenum felicitatem suam et fiducia vicinitatis addendos Banerio10 magno agenti, majora molienti animos.

Non scribam vobis, qui ea propius quam e Gallia nosse potestis, captum a Banerio Salissium11, caesas ejus copias, captas et machinas et signa equestria et pedestria paucisque munitioribus urbibus exceptis caetera Saxoniae, Misniae, etiam Thuringiae multa ejus armis cedere.

Rex Galliae principem Condaeum12 mittit in Hispaniae fines, sane trepidantis et militum egenae; etiam quae Belgarum propinquis Galliae urbibus obsidiones minantur, copiae coire jam incipiunt. Alius exercitus erit, qui conficiat, quod in comitatu Burgundiae restat.

221

Mittuntur et Sabaudicae viduae13 supplementa perquam ejus rebus necessaria.

Plane videtur hic annus et actuosus fore et nobis felix, nisi res Americanae Batavis minus succedant et circumfusi eorum urbibus caesariani partem virium illic retentent.

Civitati vestrae omnia opto prosperrima.

Nobilitati Tuae ad officia paratissimus
H. Grotius.

Lutetiae, II Aprilis anni MDCXXXIX.