4401. 1639 november 24. Van I. Jasky1.

Illustrissime et excellentissime domine, domine observandissime,

Disputationes et altercationes nunciorum terrestrium comitia nostra ruperunt has potissimum ob causas.

Disputarunt nuncii terrestres, an possidentibus beneficia ecclesiae incompatibilia - nimirum episcopatum et abbatiam - adimenda et imposterum nulli duo beneficia ecclesiastica conferenda essent an non. Deinde, an constitutio praeteritorum comitiorum de non assumendis titulis extraneis ducum, comitum, abolenda an confirmanda esset. Feudum Curlandiae duci Iacobo2 absque consensu expresso reipublicae a rege3 concessum relinquendum an adimendum. An liberum exercitium religioni Graecae in regno hoc concedendum. Abolendumne telonium an magis urgendum. Ultimo tantopere irritarunt nuncios terrestres convicia quaedam a vicecancellario regni Ossolinio4 in nuncium quendam5 ex consilio regio exeuntem iacta, quod nimis libere et non ad gustum Ossolinii sententiam suam dixerat, ut a rege postularunt Ossolinium tanquam infractorem libertatis suae puniret, quod tamen non obtinuerunt.

Ita sex septimanarum labor iam plane irritus et inutilis est. Nam nihil plane actum nec conclusum est in his comitiis nullaeque contributiones ad exsolvenda stipendia militibus promissae. Verendum ergo, ne hoc milites ad vastanda bona innocentum adigat et novas Poloniae det turbas.

Haec sunt quae tumultuario et celeri calamo de exitu comitiorum nostrorum Excellentiae vestrae scribere volui.

Quam bene valere et prosperrimo rerum suarum successu frui ex animo cupio.

Excellentiae vestrae observantissimus
Jasky mpp.

Dab. Gedani, 24 Novembris A.o 1639.

766

Adres: Illustrissimo et Excellentissimo domino, domino Hugoni Grotio, regni Sueciae consiliario, eiusdemque ad regem christianissimum legato, domino observandissimo. Parisiis.

Boven aan de brief schreef Grotius: Rec. 29 Dec.

En in dorso: 24 nov. 1639 Iasky.