Search
Add panel
[tiler debug info]
Illustris domine,
Video nova nasci et acria satis dissidia2 inter regem Angliae et parlamentarios, ad quae cum accedat reginae non dissimulatus super ante actis dolor et concursus ad eam eorum, quibus cum parlamento male convenit, haud satis video quid hinc augurari debeam. Britonum Armoricorum quinque millia Caleti exspectantur. Itaque puto eos ad comitem Guebrianum ituros. Regi Galliae non probatur consilium quod regina cepit mare transeundi; quare omnia Anglis quieta a Gallis fore suspicor, quanquam non desunt qui hos concitent partim religionis partim regii nominis tuendi studio. Reginae matris adventum Batavis non valde gratum futurum facile praevideo. Sed qui impediri possit, non video.3
Rex Hispaniae in Catalaniam nondum pervenit. Praeterea motus magnus in Arragonia exortus hic dicitur. Saepe quidem nos talis rumor decepit, aut non tam nos quam credulam plebem. Sed nunc probabilem famam facit procerum quae detecta dicitur coniuratio, cuius qui participes fuere quaerent sua pericula turbae involvere. Caeterum in Ruscinonensi tractu Millereius exercitum habet ad XXV millia; cum eo obsidet Colubrum pervenitque ad fossam et eos qui eruperant repulit, ducentis ut hic dicitur interfectis, captis trecentis. At Hispani Constantinam recepere. In Catalania agunt pro lubitu, nisi eos iam ille Arragoniae motus ad se traxit.
Videtur autem in illas partes incubitura maxima belli moles, quanquam et Harcurtii et Guichii exercitus crescunt et aliquid copiarum est in fine Burgundico. Et in Italiam it dux Bulionius, nam et ibi bellum Gallis cum Hispano mansurum videtur, etiamsi quae cum principibus Sabaudis agi coepere rata sint, quorum cardinalis Romam misit, ut sibi fratris filiam in matrimonio habere liceat. Princeps autem Thomas adhuc Hispanos nonnihil respicit. Pontifex vix est ut diu vivat et multum laborabunt reges, ut aliquem habeant sibi addictum in ea sede.
Miror imperatorem paci moras iniicere. Videtur intumescere eo, quod Lunaeburgos a nostris abduxerit et quod ingentes brevi se habiturum copias speret. Si tamen Lauwenburgicus Wahlii locum implet,4 dabitur Stalhansio aliquid audendi occasio.5 Suspicor omnem a Turca
159
metum demptum imperatori tum pactis prorogatis, tum quia Asacum Turcae in animo manet. Classis Gallica quae Portugalliam versus itura est, partim adhuc Brestae, partim Rupellae se tenet. Interim naves longae sexdecim, viginti aliae portum Colubri occlusum tenent. Marescallum Hornium Lindaviae esse audimus speramusque tandem bene successurum tractum tam diu negotium.Deus pacem det bonam christianis, et illustrem Dominationem vestram cum omni eius domo praestet incolumem,
Ill. Dom. vestrae perpetuae observantiae debitor,
H. Grotius.
Lutetiae, 29 Martii 1642.
Dicitur rex Britanniae tutelam corporis sui mandare Scotorum sibi fidis. Mediolani seditio fuit, item Nicaeae. Gillo Hasius cum militibus ter mille dilectis ex Cello vicinisque praesidiis it in tractum Coloniensem. Ex Anglia sunt literae quae dicunt a Batavis captam Ceilonem insulam in India.
Adres (volgens de uitgave der Epist.): Ludovico Camerario, reginae regnique Sueciae consiliario.
