5811. 1642 juli 26. Aan J. de Wicquefort.1

Monsieur,

La reine est partie pour Fontainebleau2 pour y trouver le roy, qui s'y faict porter en lictiere. Le chancelier y va pour recevoir des ordres sur le faict de monsieur Sainct-Marq, de Thou et d'autres. Le roy en une de ses lettres à la reine a appellé Sainct-Marc traitre, se plaint grandement de monsieur son frere, disant que c'est sa cinquiesme faute et qu'il y a eu des desseings contre sa Majesté et ses enfans. Monsieur le cardinal cependant a des noveaux absces et ne sort point de sa chambre. On a pris à Avignon le frere de Chavignac et quatre autres suspects de quelque entreprinse. Tout cet affaire est plein des defiances de tous costez et nous n'y verrons clair qu'aprèz quelque temps. Cependant on travaille pour faire revenir le frere du roy à Blois. On dict qu'il a donné au roy une promesse escritte et signée par monsieur le duc de Bouillon, par laquelle il promet qu'il aura tousjours retraicte libre à Sedan. La princesse Marie, estant interroguée sur les lettres qu'elle avoit escrites à monsieur Saint-Marct, dict que c'est sur le subject de leurs amours, aimant mieux estre tenue pour aimoureuse que pour broulliante. Les magistrats de Cologne ont adverti par des lettres le roi de la mort de la reine, sa mere, dont le roy ne monstre pas d'estre fort esmeu.

Le comte de Guiche a receu un nouvel eschec, un quartier de cavallerie luy estant enlevé par Beck. On dict qu'il y a 8 cens morts. Les ennemis depuis leur retour sont bien forts, autres disent de 30, autres de 35 milles hommes, et semblent vouloir prendre Dongery3 et passer la Meuse. Le comte d'Harcourt, aiant 13 et Guiche 4 mille hommes, ne sont pas en estat de luy resister, mais le roy y estant asteure4 plus proche y envoyera quelques regiments de ses guardes, fera de nouvelles levées, convoquera le ban et fera tout le possible pour sauver la Champagne. Monsieur du Hallier aiant pris Dieuse assiege La Motte. Le duc Charles ne paroist point. De Perpignan nous demeurons dans l'incertitude. Lamboy et les autres prisonniers de guerre sont au Bois de Vincenne.

Si les amis pensent pouvoir appaiser les affaires d'Angleterre, il est plus que temps, autrement il y a apparance qu'on viendra aux mains. Et le sang respandu esschaufe celuy qui est dans le corps. Monsieur Polhem5 est revenu icy bien satisfaict.

Je demeure, monsieur,

vostre tres humble serviteur.

Le 26 Iulii 1642.

344

Ce qu'on nous a dict du mal du comte de Guiche n'est pas si grand et de Dieuse pas certain. Quatre cens hommes que Coolhaes a levés à Hambourg sont arrivez icy. A Tarascone on faict des grandes guardes à cheval et à pied au-dedans et au-dehors.

Bovenaan de copie staat: Mons. Vicquefort.