2062. 1635 april 20. Aan L. Camerarius1.

Illustrissime Domine,

Magnum cancellarium2, qui Argentorati visus scribitur, sub ipsum Pascha novi calendarii, non ego tantum avide exspecto, ut praeparatis pactionibus sua autoritate finem imponat, sed et rex ipse3, qui hinc Compendium abiit, speculandis et propinquo magis rebus Belgicis Germanicisque et pro tempore capturus consilia, aut pacis Masarino4 suasore aut tam diu sperati a vicinis belli aperti aut sociorum mala sublevandi auxiliis quam antehac majoribus.

Montempellicardi ducis Lotharingi5 miles obsidet. It eas partes curaturus princeps Condaeus6 imperaturus et Castilionaeo7 et qui cum eo jungit copias Lafortio8. Sed mirum quam citra famam stet verus illorum militum numerus. Etiam qui sub Rohanio9 in Rhaetiam it exercitus, vix mille et sexcentos habet: sed commode evenit, quod jam ante ejus illuc adventum duce Landelio Normanno10, qui in vicinis praesidiis agebant, Galli cepere Rivam, tribus leucis a Fontani nobili castello distans Vallis Telinae contra Mediolanenses aditus munimentum.

431

Frater regius11 videtur se in rebus omnibus, etiam in dissuendo Lotharingico matrimonio, regis arbitriis aptare.

Reformati in Languedocia conventu habito constituerunt tueri possessionem ejus quam antehac habuerunt libertatis, contra novas regiorum parlamentorum ac magistratuum ipsiusque consilii regii interpretationes, quibus res ipsorum quotidie accidebantur. Id quem sit habiturum eventum, magna ex parte pendebit ab eo, qui futurus est Galliae cum externis rerum status.

Hispanus12 apud Barcinonem et Perpinianum copias colligit mediocres, in Italia ingentes, quibus primum Italorum in Gallos studia compescat, deinde per Germaniam Belgicamque arma alat. Controversia, quae ipsi cum Catalanis exorta erat, ad concordiam revocari dicitur.

De Lusitanica classe tempestatibus disjecta veremur, ut satis certus sit rumor.

Deus, illustrissime Domine, tuam illustrissimam Dominationem diu in rebus prosperis servet.

XX April MDCXXXV n. Cal. Lutetiae.

Illustrissimae Dominationi tuae addictissimus
H. Grotius.

Adres: Ludovico Camerario Reginae Regnique Sueciae Consiliario et Legato apud Praepot. Ord. Foeder. Belgii.

In margine: Ao. 1635 Script. 20 Apr. st.(n.).