2098. 1635 mei 13. Van A. Oxenstierna1.

Illustrissime Domine legate,

Quicquid tibi oneris ac molestiae a me praesente gratum est, id quidem mihi sed magis tibi ipsi imputandum quod volueris.

Uxori tuae signum animi bene affecti offerri iussi non quia me noveram debere. Debitum occasione alia alioque modo exsolvam. Tuum erit cuncta ex affectu interpretari. Non commendo tibi Broersonium2, quem tua sponte in aedes tuas recepisti; liberasti me maxima cura et solicitudine, quisquis morbi exitus futurus sit. Ego diuturniorem vitam et firmam valetudinem ipsi voveo, sed cum sit, ut cuncta, in manes abiturus, hoc abs te peto, des operam, ut restitutus valetudini quantocius ad me veniat aut defunctus cum honore sepeliatur. Sumptus in utrumque casum factos illico rependendos curabo.

Literis ad Heufdium3 de subministrandis tibi necessariis hisce adiunxi; ubi venero in Saxoniam, curabo, ut Spiringius4 tibi provideat.

Butilerium5 transiisse Lutetiam nullis ad Bulonium6 adportatis mandatis de mihi satisfaciendo mirarer, nisi rationes istorum hominum jam ante essem edoctus.

Admonitus abs te scripsi et cardinali7 et Butilerio literas, quas ut reserare possis et legere apertas abs te claudendas volui mittere. Da operam, ne desit interpellator. Quodsi bona spes nulla sit, interest mea, ut id sciam, nec deerit ratio providendi rebus meis(?).

Ego hesterna die huc Diepam veni, cum die antecedente binae naves Belgicae pro me deducendo adpulissent. Favor Dominorum Ordinum mihi exhibitus me valde ipsis obstrictum tenet.

Haereo adhuc, utrum in Belgium divertere an recta Hamburgum traijcere cupiam. Ut id velim, faciant literae Camerarii8, qui Dominos Ordines et principem9 etiam aliquot dies hac de causa mansisse Hagae Comitis scribit, licet princeps nonnihil sit impeditus ob corporis minus commodam valetudinem.

Ut hoc magis expetam patriae meae rationes et status Saxoniae satis perturbatus hortantur.

474

Scribit Camerarius cuncta ad expeditionem in Belgio parata et coniunctionem cum Gallicis copiis sperari. Addit, sed nonnihil subdubitans, Saxonem10 turbatum visa ratificatione Caesaris11 cum anilia(?) tergiversatione ac limitatione, ut non desint, qui illos pacis Pirnensis12 temtatus ruptos scribant. Sed de his certiora, ubi venero propius.

Meministi me cum pictore13, qui me depinxerat, egisse, ut quasdam imagines iusta cura depictas ad me mitteret. Sunt b.hae: regis Galliae14, reginae15, Henrici 4ti, reginae matris16, ducis Airebauntis(?)17, cardinalis Richeliacii, mareschalli De la Force18, mareschalli de Brezé19. Et propria mea si possem quoque habere cardinalis d'Amboise20, esset mihi gratum. Heufdius illi ad tua iusta satisfaciet.

Vale, et nos ama.

Raptim Diepa, die 13/3 Maij Anni 1635.

T. amicissimus
Axelius Oxenstierna m.p.