Search
Add panel
[tiler debug info]
Illustrissime Domine,
Gratias, quas debeo et meo et publico nomine, persolvo Deo immortali, cum te non modo periculo exemit, sed et ejecta morbi praecipua causa in spem erexit firmioris in posterum valetudinis, Eumque veneror, ut et tuas et omnium bonorum pro te preces semper exaudiat.
Legatum Britannicum2 quo magis nosco, hoc magis et candorem animi ejus et sincerum pro Domo Palatina studium et tui in eo amorem non fucatum perspicio nec eis alendis desum. Gallis, ne quid ei aperte respondeant obtentum praebet exspectatio, quo abitura sit Arondeliana3 legatio. Spero genti nimium desidi resurrecturos animos, ne ultra trahi se verbis patiantur et rerum tempora patiantur effluere.
Romae de pace agi dubium non est, prius tamen arbitror cum caesare4 quam cum Hispano5. Galli, quid agatur, occultant, sed multi sentiunt id agi, ut caesar de Palatina Domo, de Lotharingo6 Gallus suopte arbitratu constituant. Certe non strepunt arma.
Ducem Bernhardum7 in ipso procinctu febricula deprehendit. Abiit hinc dux Bulionius8 missa nondum adita, caeterum cum romanis pontificibus se sentire non dissimulans. Creditur publicum transitum Sedani facturus. Leodii curam
149
rex9 ei commendavit et puto Ordines Foederatos civitatis vicinae tutelam non abjecturos.De duce Bernhardo scripsisse me antehac arbitror, ipsi unde dignitatem sustentet dari annua CXX millia florenorum obligatis terris in Gallia; in usum militis praesentis pecuniae eum auferre sexcenta florenorum millia; in Augustum mensem promitti ei novam pecuniam, pro numero, quem tunc habiturus est, militum. Mittit dux in Angliam D. Ponicam10 supplementi quaerendi causa; inde iturum ad magnum D. cancellarium11.
Video quae Seldenus scripsit12 ab Anglis serio agi idque ne cum Batavis concordiam turbet, metuo. Galli piscatum non curant; navigatus controversias temporaria aliqua pactione, ut puto, extricabunt.
Daniae regem13 Viennae obtinuisse filio suo14, dum vivit, archiepiscopatus Bremensis fructum pro certo scribitur et credunt id Britanni.
Exspectatur hic, ut princeps Arausionensis15 Scenquiano castello tam mature potitus in hosticum aliqua penetret vacuo omni anni tempore, per quod in illis partibus bellari solet.
Rohanio16 nunc pecunia submittitur, quod, si ante factum esset, in castellum Datium videtur conatus ejus futurus fuisse non irritus.
Turca classe validus terrorem injicit Ethruriae, praesertim cum in Gallia portus habiturus sit sibi patentes.
Videtur et pontifici17 et imperatori18 non displicere locus colloquii de pace Colonia Agrippinensis.
Viennenses literae ad indictum solenniter per Magontiacensem conventum Ratisbonensem venturos a Bavaro utroque19 legatos pro certo habent eosque morem per omnia gesturos imperatori.
Sed ne molestus sim, Illustrissime Domine, claudo epistolam repetitis quae supra posui votis.
Tuae Illustrissimae Dominationi observantissimus omni cultu studioque
H. Grotius.
Lutetiae, XV Maii MDCXXXVI.
Adres: Ludovico Camerario, Reginae Regnique Sueciae Consiliario et Legato apud Praepot. Ord. Foeder. Belgii.
Boven aan de brief in margine in de copie te Uppsala: Redd. A.o 1636 d. 2/12 Iunii.
