200

228. 1612 Febr. 27. Van Is. Casaubonus1.

Literis tuis quas paulo ante acceperam, respondi affatim, praestantissime Groti, ante paucos dies2. Significavi tibi quanta cum animi voluptate Serenissimus Rex tuam illam prudentissime ϰαὶ εὐσεβέστατα scriptam epistolam legerit. Sciebam non aliud Regis futurum de iis quae scribebas iudicium. Itaque ad eius Maiestatem tuas statim misi: quas, si meas accepisti, fuisse ipsi gratissimas non ignoras. Non repeto nunc caetera quae nuper3 scripsi. tantum te rogabo, ut quas istis adieci cures deferendas. Scripsi iam semel ad Bertium4 et etiam Vorstium5, quae iussus fueram scribere. Faxit Deus, ut pio fine tota illa controversia terminetur. Ad clarissimum Heinsium nunc non potui, et debet ille quaternis mearum responsionem. miror unde hoc illius silentium. πάρος γε μὲν οὐϰ ἐϑάμιζεν6. utinam ipse valeat. Deus te servet, vir magne. Amabo te, τὰς πρὸς τὸν Λύδιον7 curato. Vale. Londini XIV. Kal. Mart. stylo Anglico. CIƆIƆCXII.