1670. 1631 augustus 29. Aan G.J. Vossius1.

Spero, virorum optime, res omnes tibi in magna urbe ex voto processuras et repertum tibi fidum futurum senectuti portum.

Nos hic jactamur exspectantes

- - - - - unius Ingens

Bellum uteri2.

Iunius noster3 in Anglia nunc est, quam etiam tam indigne habitus amare non desinit. Literas illi dedi ad Londinensem episcopum4. Vides, quantum mihi in literis, quas semper colui fiduciae sit ut ad ignotum ausim scribere. Si Barones Wottonii5, quos tibi commendavi, in patriam brevi redierint, habebit ibi Iunius fidos adjutores. Literas ab ipso exspecto.

Noomsii6 desiderio nunc quidem gerere non possum, quia abest rex cum comitatu; deinde nescio, an satis commoda sint tempora. Nam nebulones quidam omne nomen Amstelodamense hic invisum reddiderunt tanquam induciarum quam belli cupidius. Ego parte mei suaviore hinc absum, cui brevi spero recomponi, ut rursum fiam ϰατὰ τὸν Πλάτωνα ἀνδϱόγυνος7.

Tu quoque cum tui dimidio8 pulchre vale et cum felicissima liberorum segete.

29 Augusti annis duodecim post multorum adversorum mihi patriaeque initium.

433

Tuus totus ut semper
H. Grotius.