2163. 1635 juni 29. Aan L. Camerarius1.

Illustrissime Domine,

Quam mihi dolet, incerto itinerum literas et tardius et minus tuto commeare, tam gaudeo ita te mei manere memorem, ut occasiones non omittas docendi me ea, quae scire aut jucundum est privatim aut utile publice.

Prima, quae acceperamus, junctarum virium prospera multum inquinat illa capto Tilaemontio2 Galli militis ultra etiam militarem modum progressa licentia idque, ut mones, eo accidit majore cum malo, quod quae Galli ad Belgas jactitant in edicto aut pro religione inter ipsos communi, aut pro Belgarum propria libertate3, fidem post talia facta aegre invenient. Novi heic de felice in Brabantia proelio sunt nuntii, sed qui non satis certos auctores habent ut nos cogant credere. Itaque ἐφέξομεν.

De Gallasii4 copiis Rhenum traductis vera audistis, nisi quod numerum non parum auxit fama. Ipse vero per Tirolanas regiones in Mediolanensem profectus armisque ibi Hispaniae, sive ad sua tuenda, sive ad inquietandam iterum Vallem Telinam praefuturus ex multis Italiae locus scribitur. Illis copiis exspectant prudentes, ut aut vis occurrat in proelium parata Gallis sua societate atque exemplo facile inflammaturis longam Batavorum segnitiem aut vastatis agris impervia ob famem itinera fiant, quod opus jam ex Picardia caeptari a Gallis dicitur.

52

De classe ad Campaniae oram5 nec vera nec falsa reperiuntur, quae dicta sunt omnia. Tres naves periisse constat: luxatas tempestate alias, sed ita ut jam rursus, non quidem omnes, sed multae apparere incipiant. Rex6 etiamnunc ad fontem est Bellaqueum, laetus tot in se Dei muneribus. Cardinalis7 neque tam recte valet, quam volunt boni, neque tam male quam vellent mali. Seditiones fiunt satis multae, sed maxime in partibus ab aula et milite remotis; sed quibus speramus remedium fore a regis prudentia ac bonitate.

Laetus intelligo plus aliquanto prorogandarum induciarum spei apparere nostros et Polonos inter correctis iis, quae reginae nostrae8 jus laedentia indices legationis literae antehac continebant. Episcopi adhuc in dissuendo fratris regii9 matrimonio laborant.

Deus, Illustrissime Domine, te cum tuis omnibus sospitet.

Illustrissimae Dominationi Tuae addictissimus
H. Grotius.

XXIX Iunij nov. calend. MDCXXXV. Lutetiae.

Adres: Ludovico Camerario, Reginae Regnique Sueciae Consiliario et Legato apud Praepot. Ord. Foed. Belgii.

Boven aan de brief in de copie te Uppsala in margine: A.o 1635. Re. 16/16 (sic) Iulij Hagae.

En onder aan de brief: Inscriptio ut alias.