2581. [1636 mei 6]. Aan Ch. Marini1.

Monsieur,

J'ay envoyé vostre pacquet à Wismar où estoit le grand chancelier2. Le pacquet dicte que j'avois receu le 29 d'Avril ayant esté envoyé par nous le 12 du mesme mois comme tesmoignoit la lettre de laquelle m'avez honnoré3.

La meilleure nouvelle que ie vous sçauray mander est que nous sommes entrez en nouveau traité avecq la France pour ne faire paix que conjoinctement: et que le marescal Banier4 a desfaict trois régiments de cavallerie saxone delà de Sale de quoy je mande les particulairitez plus menues à monsieur le duc de Rohan5 en la lettre6 par laquelle je luy responde à celle qu'il luy a pleu m'envoyer7 par le sieur Priolau8 du contenu de laquelle sans doubte il vous fera part.

Le duc de Weimar9 est sur son partement chargé d'argent et des promesses plein de courage pour entreprendre quelque chose de grand. Outre la sienne messieurs le prince de Condé10 et le cardinal de La Valette11 auront chacun une bonne armée et au mesme temps on voit de grands préparatifs pour disputer aux Espagnols la possession de mer Méditerranée et de l'Océan. A quoy si les Anglois se voudroient joindre nous aurions beau jeu.

Je n'oublie jamais de recommender vostre persone et voz affaires là où il faut et demeure, monsieur,

vostre serviteur très humble
H. de Groot.