6143. 1643 maart 21. Aan J. de Wicquefort.1

Monsieur,

J'ai grand-peur que le marescal Torstensoon ne reçoive encore plus de mal, n'estant pas bastant de subsister avecq ses forces contre celles de l'empereur et de ses alliez, puisque la diversion du costé de la France, sur laquelle il avoit faict estat,2 cesse, le comte de Guebrian avecq son armée tres foible se tenant autour de Brisac. Et il y a de bruict icy3 qu'il [y] a trefve de vingt jours entre luy et les gens du duc de Baviere, qu'on dit estre cinq mille chevaux, sept mille à pied, et tenir Uberlingue blocqué. En Picardie le roy donne ordre de ne faire aucune hostilité contre ceux de Flandre avant que d'avoir du commandement. Et on croit qu'il y a de gens d'icy à Bruselles, et d'Espagne icy.

Le pere Sirmond à cause de son aage estant deschargé des confessions du roy, monsieur de Noyers luy a surrogué le pere Dinet de la mesme compagnie des jesuistes, mais qui sçait plus des affaires du monde et prend plaisir à agir. La santé du roy n'est pas telle que les Fransois et les amis des Fransois le doibvent desirer. On croit que le roy a disposé secretement par testament de la regence et la donne à la reine, mais on ne sçait pas encore à quelles conditions.

La Motte en Lorraine est delivrée du blocquus, les soldats qui la tenoient pressée s'en estans allez vers Brisac ou Uberlingue. Sancte-Marie, colonel du duc Charles, a esté pris en guerre. On prepare un convoy pour Arras. Il y a eu du remuement à Bordeaux et grandes inondations à Bayonne et ailleurs. Monsieur du Hallier est fait gouverneur de la Champagne. Il y en a qui croyent qu'Olivares n'est pas si mal avec le roy d'Espagne comme ils en font la mine et qu'il ne laisse pas d'envoyer des advis à la cour.

Autant que nous apprenons icy, les affaires du roy d'Angleterre vont assez bien, le peuple partout se lassant de la nouvelle domination du parlement, accompagnée des grandes impositions et perte du trafficque.4 Nous verrons de loing quels effects produira la correspondance entre Hollande et Zeelande.5 Ce que ceux d'Hollande6 ont fait contre la reine d'Angleterre n'est qu'une evaporation d'une passion injuste et de mauvaise consequence. Les rois de France n'auront pas grand subject de se fier à tels alliez.

173

Monsieur Godefroy,7 qui est icy deputé de la part de Geneve, estant dans l'antichambre du roy avecq le pere Veron8 s'est tant eschauffé à la dispute qu'on a eu grande peine de les empescher de venir à coups de poings ou mesme, comme on nous dit, de cousteaux.

Nous avons icy les mesmes nouvelles que vous me faites la faveur de m'escrire, de Marignan et de Saint-Thomé,9 laquelle isle les Hollandois devoient avoir abandonnée et rendue inutile.

[Je suis, monsieur,]

vostre tres humble serviteur.

Le 21 Mars 1643.

Le courier qui avoit esté envoyé de la part du duc de Baviere au nonce est party vers Baviere.

Bovenaan de copie staat: A monsieur Vicquefort.