6220. [1643] mei 16. Aan J. de Wicquefort.1

Monsieur,

Depuis que je vous escrivis ma derniere lettre, nous avons perdu le bon roy et vrayement tres chrestien Louis XIII,2 qui est decedé au 14 de May à trois heures après midy, mesme heure, mesme jour du mois, mesme mois auquel par la mort du feu roy son pere il estoit parvenu à la royauté. Il a monstré en sa longue maladie une grande bonté et patience et tesmoigné un grand desir de la paix tant de royaumes et estats que de l'eglise. Les parents de monsieur le cardinal sont fort hays, tant à cause de la forme de son gouvernement qu'à cause de leurs richesses, auxquelles il semble qu'on veut avoir recours plustost que de venir à des nouvelles impositions ou creations d'offices. C'est pourquoy madame d'Esguillon n'a pas mal fait de sortir de Paris et plusieurs sont d'advis qu'elle fera bien de se retirer à Avignon. On croit que monsieur de Millerai pourroit bien succeder au marescal de Guebrian, qu'on dit n'estre pas trop aimé dans son armée.

Le corps du feu cardinal-infant est passé icy. Le duc d'Anguien - la femme duquel a fait un avortissement - va au-devant la duchesse d'Orleans jusqu'à Peronne, Monsieur

274

Pour la paix iront de la part d'Espagne le marquis de Castel Rodrigo, Spignola et un Piedmontois. Les passeports auront besoing d'estre changez à cause du nouveau regne icy. Et on doute si le duc de Longueville, estant fait du conseil de la regence, aura envie de faire le voyage. Monsieur d'Avaux et monsieur d'Esmery seront aussi bien aises de se bien establir icy avant que d'aller à Munster. Nous apprenons que Tubadel est allé avecq deux mille chevaux, mille gens de pied pour pourvoir aux necessitez d'Uberlingue, et que le duc Charles a mandé vers luy l'infanterie qu'il avoit en Lorraine.

L'opinion est que le roy est mort de venin, et sur cela beaucoup de discours. On parle aussi plus publiquement que cy-devant de la cause de la mort du duc de Wimar. A la cour ombrages, soupçons, desfiances ne manquent point.

Les affaires entre le pape et le duc de Parme semblent se disposer à une suspension d'armes. Je suis marry que le roy et la reine d'Angleterre demeurent separez par les forces ennemies et Reroin assiegé et le roy party d'Oxfort.3 Il faut quelquefois de la patience. Dieu maintiendra le roy et son droit, quand il plaira à sa toute-puissance.

J'ay leu la partie qu'il vous a pleu m'envoyer de l'oeuvre de monsieur Graswinckel.4 J'ay tousjours estimé l'auteur et l'estime tant plus, ayant veu cette piece pleine d'erudition et de force d'esprit. Je ne croy pas que dans les Provinces-Unies il y a aucun qui eut mieux reussi.

Le roy avant sa mort a voulu que le duc d'Orleans embrassa la reine avecq promesse d'assistance mutuelle après la mort du roy. La reine avecq le nouveau roy s'estant retirée en sa chambre, vint monsieur le prince et se mettant à genoux promit sa fidelité pour la charge de grand maistre et de ses gouvernements. Vint après le duc d'Orleans et baissa la main du roy promettant fidelité. Quand la reine vint à Paris, sa carosse estoit environnée d'un grand nombre des gardes du roy à cheval et pied comme si c'eust esté une armée. La reine fut assise au derriere de la carosse - selon sa coustume - ayant les deux enfans de ses costez. A l'une portiere fust le duc d'Orleans, à l'autre madame de Lansac, gouvernante du jeune roy. Contre la reine estoit assise madame de Brassac, premiere dame de la reine. Les cris furent grands par tout le chemin de ‘vive le roy’. Cecy se passa hier à trois et quatre heures après midy.

Je demeure, monsieur,

vostre tres humble serviteur.

Le XVI May.

On nous dit que le comte de Guebrian a six mille hommes à pied, huict à cheval, que Schetner pour l'empereur assiege Freusberg, qu'Olivares est au prison de l'inquisition, que le roy d'Espagne fait monnoyer l'or et l'argent des eglises soubs promesse de le rendre avec l'interest, que Mercy a mis du bled dans Offenburg, que le marescal de Guebrian fait mettre son pont entre Withweiler et Rinauw, que don Melos a un camp volant près de Valenciennes et qu'il y a parmy eux quelque commancement de sedition à faute du payement. Je ne sçay pas s'il est vray ce qu'on publie icy, que les deputez du parlement

275

Bovenaan de copie staat: M. Vicquefort.