Search
Add panel
[tiler debug info]
Quas tertio quasque 11 Iunii dedisti, mi frater, ita nunc pariter accipio. Scripsi ad te hodie per Opdamium2 aut Marquethium3. Nam utri literas amicus, qui suscepit, daturus sit, dubito.
Non multum habeo quod addam nisi quae interim didici. Mantuanum4 cum Sabaudo5 transegisse, modo rex Galliae probet pacta; Hispanum nihilominus instare Casalio munimento plusquam antehac et arctiore obsidio; Rupellae divites habere victus aliquid, inopes esurire et pellendae fami pisciculos et herbas extra moenia summo periculo quaerere, ita ut plerique intra mensem finem sibi obsidii spondeant. Angli, qui tertium venturi dicuntur, non multum regiis injiciunt metus paratis ad portus angustias tormentis centum neque largum ipsis ad vim continuandam spatium aestu indulgente, id est, non ultra horas quatuor. Regi magnus cymbarum numerus et exercitus supra viginti millia non nomine, sed reipsa, disciplinae satis laudabilis. Principis Condaei6 milites ferme quingenti caesi a Rohanii7 ducibus. Oppida duo a Mommorancio8 capta multa cum caede.
His, quae hodie per literas tibi commendavi, illud accedat rogo, ut memineris effigiem aut sceleton vermium ex una radice in multa capita surgentium. De Phaenissis9 intellexeris jam sententiam, rogo quamprimum sciam, quid sperari debeat. De Syriaci poëmatis interpretatione10 in plerisque tibi assentio. De quibusdam obscurioribus libebit et aliorum intelligere conjecturas. Inter caetera de Solomone, quin verum dicas non dubito. Quod Hagae adversus remonstrantes factum scribis per mihi dolet. Libri de Veritate religionis Christianae11 cardinali Barbarino12 aliisque Romae probantur. Hic paene omnibus romanensibus et protestantibus.
Salutant nostri te tuamque13 et tuos: simul optimos parentes et quicquid est bene nobis volentium.
24 Iunii 1628.
Tuus tuo jure
H. Grotius.
