Search
Add panel
[tiler debug info]
Choose a letter
Utinam, Camerari doctissime, tam laeta hinc nuntiare possim quam ea sunt, quae de regis vestri2 rebus scripsisti3, quae non ego solus legi cum voluptate, sed amicorum agmen. Erant enim et res dignae regis magnitudine et rerum magnitudinem verba aequabant.
Nunc is est rerum Christianarum status, ut ex solo illo mundi angulo veniant, quae cum applausu ac gaudio excipiantur; alibi victoriae in controverso, tempora inter pacem bellumque infida et in ipsius regni vitalibus novi morbi et remedia prope ipsis morbis acerbiora. Nam cum reginam4 paulo ante florentissimam acri custodia septam intelligimus, quis non et stupeat tam subito versum fortunae orbem et misereatur regis5 in eas conjecti angustias, ut aut fideli ac felici ministro6 spoliare semet cogeretur, aut in eam durius consulere, quae ipsius natura mater, meritis etiam regni parens et ab ipso et ab aliis fuit nuncupata? Quae omnia ut per se sunt gravia, ita fieri non potest quin ejus animo sint gravissima, qui pietatis et justitiae laudem tam anxie hactenus quaesitam servare apud conscientiam forte poterit, apud famam non aeque, quippe quae de regum actionibus adeo insperatis, prout affectus sunt, varie judicat, saepe et malignitati propior. Etiam Bassompetram7, Helvetiorum ducem, in Bastiliam datum video non excidisse suorum ac ne Gallorum quidem animis et favore, quem saepe ipsa adversa accendunt. Uxor8 quae fuit Lesdiguerii, in Delphinatum missa vile omnibus damnum est, levi poena defuncta actae per tot probra vitae. Contiaca et Elbaevia principes9, feminae nihil durius passae quam quod in agros suos jussae sunt discedere, brevi sermone transmittuntur. Abbas Foxius10, qui res hic agebat Guisii11, et ipse carceri mancipatus in urbe lingua tenus liberrima materiam dedit suspicionibus adversus ipsum Guisium, quid facturus sit, quid passurus. Sed nunc recentes inde nuntii omnia ibi in regem fida, in Richeliacum cardinalem amica nuntiant concilia-
353
tore Condaeo Principe12, cui tam pronus in Riceliacum quam aversus a regina seniore animus, et cum Guisio pridem multa communia, nunc et sperata affinitas. Sed haec minora omnia prae illo de regis matre, propositi tenacissima, cui alterum malum frater regis13 accedit discordiae manifestus et Aureliani omnia ad tutelam sui comparans, cui rei duplex adfertur medicina: legati matrimonium expetitum14 et alia ei grata offerentes, si ea ratione regi quam matri conjunctior fiere posset, quod per cardinalem Valettam15 tentatum nondum successit; praeterea equitatus et cohortes missae, quae urbis aditus et exitus claudant locaque proxima insideant.Haec omnia rumores haud dubie in terras exteras in asperius efferent metuendumque, ne inde et bellum acrius excitetur in eos, quorum rebus Gallia favere creditur, et rationes pacis in Italia difficiliores fiant.
Vale cum viro illustri parente tuo. Salutant te nostri omnes.
6 Martii 1631.
Tui nominis cultor studiosissimus
H. Grotius.
