S.P. Pater.
Decimo tertio huius mensis sub noctem multam Parisios adveni2; quo Antwerpia, sed per ambages et alieno habitu contenderam. Id certius visum quam praesidium militare deposcere. Deus consilio meo felicem dedit eventum, sed cum huc venissem Rex et Aula abierant ad Fontem bellae aquae. Remanserat Boissisius3, qui mea causa substitit, ut a me salutaretur. Ex ipsius sententia Parisiis manebo, donec quid faciendum mihi sit ex Aula certior fiam. Non tantum quae ad securitatem meam pertinent, sed et alia sperare me iubet. Omnino amicos hic plurimos reperio magnae dignitatis atque auctoritatis. Quid de caetero futurum videbimus. Interim consultum omnino est, ut vos pro uxoris libertate sine mora, quantum fieri potest, laboretis, neque desistatis antequam aliquod habeatis rescriptum; cuius exemplum mihi transmittatis, ut hic cum amicis deliberem quid ultra faciendum sit. Legatis4 patriae hinc discedentibus Rex abunde testatam fecit suam pro Reipublicae nostrae salute curam, ostenditque penes se non staturum quominus se quam amicissimo uterentur, sed ante federis
66
instaurationem voluit sibi satisfieri iis in rebus, in quibus negat eam sui habitam rationem quam beneficiorum magnitudo postulabat. Ego non desino omnibus mihi recte volentibus Patriam commendare cuius amorem mihi nullae unquam iniuriae extorquebunt. Ubi ad me scribetis, litteras destinare poteritis ad mercatorem Rambouilletum5, a quo pecunias mihi necessarias accipiam; is Parisiis habitat. Si qua occasio est curandi Rhotomago inscribi poterunt Bloisio fratri Couwemburgii6. Is enim Rhotomagi habitat, Parisiis litteras permittere poterit. Saluta matrem, D. Lassonium7, avunculum, materteram, fratrem, sororem8 et quicquid amicorum est: nominatim affinem De Byaeum9 cum familia. 16 Aprilis 1621. Lutetiae.Tuus tibi obedientissimus filius
H. Grotius.