4470. 1640 januari 14. Aan D. de Groot1.

Quod cepisti consilium, mi fili, id Deum rogo, ut fortunet. Certe rerum periti omnes mecum judicant optimas tibi inde spes portendi; contra in Batavis nihil nisi projectum ac vulgare.

Bene fecisti, quod amitae2 exhibuisti quod supremum possumus. Placet et in Zelandiam iter in comitatu maxime matris.

Bonum tibi consilium dedit senator Reigersbergius3, ut commentarios scribas rerum ducis Vinariensis4, quatenus tibi notae sunt. Tuas ad me literas5 ad illud spectantes tempus collegi et prima occasione mittam. Hac enim opera et gratiam persolves optime de te non minus quam de publico merito principi et temet exercebis tum in memoria militarium rerum tum in scriptione. Id ubi perfeceris, perlegere mihi suavissimum erit.

Vale, mi fili.

Tibi optime volens pater
H. Grotius.

Lutetiae, 14 Ianuarii 1640.