Search
Add panel
[tiler debug info]
Choose a letter
Excellentissime atque illustrissime domine,
Quo tempore Mileraeus2 cum parte copiarum e castris egressus obviam illis, qui a Dorlano cum carris venerant, in reditu erat, Lamboius3 circa horam post meridiem tertiam simulato consilio alia parte castra oppugnandi, ad quam et ex oppido fiebat eruptio, vertit se ad eam partem, quae Ranzovio4 attributa fuerat castellumque pro castris situm bis cepit, bis etiam perdidit, cum interim alii Hispanorum cum multis fascibus sperarent se posse implere fossas castrorum et ita in castra penetrare. Multum Gallis profuerunt machinae et Halerii5 cum copiis adventus sub ipsum illud tempus et voluntariorum virtus. Itaque depulsus hostis Duacum versus se recepit. Galli suorum sexcentos ferme amisere, Hispani plures. Cum haec secundo Augusti evenissent, sequentibus diebus abundante jam pulveris copia impleti fuere cuniculi, quorum uno erumpente dissiliit quoddam adhaerens moenibus urbis propugnaculum, ita ut per eam ruinam aditus jam Gallis in urbem foret; at oppidani, qui validiores sunt quam miles praesidiarius, ultimum periculum praevenire volentes rem ad pactiones deduxere estque in hac urbe fama jam potiri oppido Gallos. Reprehenditur Lamboius, quod non aut Halerium potius adortus sit, antequam is se cum Mileraeo conjungeret, aut quod non castra oppugnavit maturius, dum adhuc e castris bona pars aberat et longe erat Halerius.
De urbe Taurinorum disseritur varie. Leganesius6 castra Harcurtii7 quinquaginta machinis infestat; in urbe non desunt ea, quae maxime sunt necessaria. Ut cuncta Gallis e voto fluant, duorum aut trium mensium restat negotium.
Chiausius Turcicus8 in hac urbe est; negat quicquam esse de morte Ebrahimi9.
Video ita judicari a plerisque istam junctionem Bannerii10 cum sociorum copiis, quae nuper facta fuerat, plus dissidiorum quam fructus11 attulisse.
448
Catalaniae motus rex Hispaniae novo quodam prudentiae genere sanavit. Nam improbitatis iis, quae milites fecerant, populo vetera jura salva promisit atque etiam praefectum eum12 dedit, quem optabant maxime.
Haec sunt quae nunc habemus, quibus vota addam, Excellentissime et illustrissime domine, pro tuae Sublimitatis, reginae13 regnique Suedici et christiani orbis bono.
Tuae Sublimitatis cultor devotissimus
H. Grotius.
Lutetiae, 11 Augusti 1640.
Rediere Brissacum et Erlachius et Hatzfeldius14. Verum iis absentibus octoginta Galli equites in urbem educti, quibus praeest Ossenvillius15 Gallos haud dubie validiores in ea urbe fecerunt.
Iussit rex diligentius inquiri in eam vim, quam Possiaci factam scripsi antehac16. Sed nihil boni exspecto; ita omnia hic corrupta sunt.
Constat in urbe Atrebatum fuisse dissidia aliis urbem dedere volentibus, nolentibus aliis, interim castra iterum oppugnata. Heri intratam a Gallis urbem multi hic credunt.
Adres: Axelio Oxenstiernae, sacrae reg. Maj. regnorumque Sueciae senatori et cancellario.
