5304. 1641 augustus 3. Aan A. Oxenstierna.1

Excellentissime et illustrissime domine,

Aira regi dedita est XXVII Iulii; exiere bene sane milites mille et quingenti. Castilionaeus et Breszaeus2 nunc Doncheriachum obsident, Galliae oppidum captum nuper a principibus.

435

Americana classis in Hispaniam salva venit. Ea labescentem ibi fidem restituet.

Gillo Hasius4 ad eos, quos habuit, milites adiungit alios ex Tiroli et Wurtenbergico, ita ut habiturus putetur octo millia. Cum illis Friburgum Brisgoiae an alium locum sit impetiturus, adhuc incertum est.

Dux Lotharingus pergit ex proximis sibi terris Germaniae, Galliae et Belgicae tributa capere, exercitum alere et formare, addere adhuc se nulli, omnibus de se spem aut metum facere. Plerique credunt fore, ut se iungat principibus, qui Sedani sunt. Id si non fit, cohibiti, ne Mosam transeant, principes isti aegre invenient unde famem a Sedano propulsent.

Videtur regina Angliae valde appetere iter ad aquas Spadanas quasi valetudinis causa. Legatus Galliae5 quas potest nectit moras. Veretur enim, ne illa principes, qui Sedani sunt, Angliae illiget communi pacis desiderio simulque matri suae6 in Galliam paret reditum. Iam intelligimus captum esse Doncheriacum, cardinalis Hispani exercitum esse ad S. Venantii, Lamboium7 cum suis appropinquasse Namurco commeatuum causa, ducem Lotharingum cum maxima copiarum suarum parte ad Lonviacum esse, Gallorum in Italia in urbem Alexandriam infelicem fuisse conatum.

Deus [etc.]

Lutetiae, XXV Iulii/III Augusti anni MDCXLI.

Dux Guisius iterum Bruxellam ivit diciturque reducturus inde IV millia. Ex iis, qui comitis Suessionensis nomen secuti erant, multi in Galliam rediere regis permissu.

Obsidio Conisae in Italia desiit introducto in id oppidum ab Hispanis maiore praesidio. Sunt qui putant Gillonem Hasium Rinfeldio imminere. Hispani commeatus quosdam intercepere, qui a Dorlano ad urbem Atrebatum ibant.

Ante hos annos quatuor cum D. Spiringio8 rationes aequavi. Nunc salaria percepi ad finem Iunii. Aequabo autem rationes, quando et cum quo volet tua Sublimitas.

Bovenaan de brief in de copie te Leipzig: Argumentum. Aira capta. Parlamentum lege agere debet contra memoriam comitis Suess[i]onensis. Lotharingici conatus. Varia nova.