4886. 1640 oktober 20. Aan A. Oxenstierna1.

Excellentissime atque illustrissime domine,

In Italia factas inducias et prorogari constat diciturque clam hic esse aliquis missus a duobus principibus Sabaudis2.

De Catalanis mira narrantur: ita incensos eorum animos in milites regios, ut iis viscera extrahant. Id si verum est, antiqui motus, quos plerumque veniae desperatio consequi solet, prudenter aluntur a Gallis et Batavis. Poterit inde malum nasci regi Hispaniae diuturnum et ipso contagio fluere longius Arragonibus etiam accisam libertatem gravate ferentibus.

Rex magnae Britanniae parlamentum Angliae indixit in mensem Novembrem3. Interim petit indutias a Scotis, quorum exercitus pecuniae deliquio multum diffluit et ex ea nobilitate, quam Eboracum ipse convocaverat, delegavit aliquos, qui in collimitio cum Scotis conferant. Interim in Gallia tributa gravia, gemitus plebis, motus nulli. Rex vero Britanniae, ut ad eum redeam, etiam pecunias quaerit mutuas a nobilitate et civitatibus ad ducenta millia librarum sterlingicarum, ut eas solvat post finem parlamenti. Ea ratione sperat se multos habiturum in parlamento, qui liberaliter ad petendas a rege collationes sint assensuri accedente ad gratiam etiam singulorum indemnitate.

Erlachius4 Laufenburgi etiamnum est, Goetzius5 in libertate et non ingratus imperatori.

Deus, Excellentissime et illustrissime domine, praesens regno tuaeque Sublimitati adsit.

Tuae Sublimitatis cultor devotissimus
H. Grotius.

Lutetiae, 10/20 Octobris 1640.

Qui hic est pro principe Thoma abbas est Busquettae. Regis Galliae, qui in Italia fuit, exercitus circa Genevam hiematurus creditur, quae sicut a commerciis Galliae exclusa est, ita fore, ut excludantur et Helvetii, ne comitatus Burgundiae ab ipsis alatur, multi existimant. Consultatur hic de imponendo solido in quamque libram pretii mercium.

Tubatelus6 duorum mensium stipendia adfert Vinariensibus.

574

Extra urbem Atrebatum munimenta fiunt tuendae urbi. Catalani XL rectores sibimet effecere et XII a Massilia naves longas auxilium sibi exspectant.

Adres: Axelio Oxenstiernae, sacrae reg. Maj. regnorumque Sueciae senatori et cancellario.