Search
Add panel
[tiler debug info]
Choose a letter
Vir nobilissime,
Gratae mihi fuere Nobilitatis vestrae literae datae 16 Maii2 et quae iis continentur libenter cognovi optoque sociis et amicis regni Suedici omnia felicia.
Quae hic habemus non ita multa, sunt comprehensa meis ad illustrissimum D. parentem Nobilitatis vestrae literis3. Eas literas apertas ad Nobilitatem vestram mitto idemque sum facturus in posterum.
Piccolominaeum4 mansurum in Belgicis partibus, sed partem ab eo copiarum
358
ad caesarianos mitti hujus aulae opinio est. Quo modo se elector Saxoniae5 eximere bello possit, equidem non video. Lunaeburgici et Brunsvicenses medii esse volent, dum nostrae res meliores sunt, si fortuna contra nos flare coeperit, ex mediis hostes fient; nam et fides et constantia e Germania emigrasse videntur.Batavi rectius mihi facturi videntur, si in Daniam alios, alios in Poloniam mittant, tum ne regum postpositus fiat ipsis immitior, tum ut eodem tempore res utrobique geratur communicatis legatorum inter se per literas consiliis et actibus.
Nobilitati vestrae opto prosperrima.
Nobilitati vestrae ad omnia officia paratissimus
H. Grotius.
Lutetiae, 28 Maii 1639.
